Shtetet e Bashkuara po shqyrtojnë kërkesën e Ukrainës për të siguruar raketa “Tomahawk” me rreze të gjatë veprimi për përpjekjet e saj për t'u kundërvënë pushtuesve rusë, tha të dielën zëvendëspresidenti JD Vance.
Presidenti ukrainas Volodymyr Zelensky u ka kërkuar Shteteve të Bashkuara t'u shesë raketa Tomahawk kombeve evropiane që do t'i dërgonin ato në Ukrainë.
Vance tha në "Fox News Sunday" se presidenti i SHBA-së Donald Trump do të marrë "vendimin përfundimtar" nëse do ta lejojë marrëveshjen.
"Sigurisht që po shqyrtojmë një numër kërkesash nga evropianët", tha Vance.
Raketat “Tomahawk” kanë një rreze veprimi prej 2,500 kilometra dhe do të ishin një aset i fuqishëm në arsenalin e Ukrainës, ndërsa ajo lufton kundër sulmeve të rregullta me raketa dhe dronë rusë.
Një dërgesë e tillë armësh pothuajse me siguri do të shihej nga Rusia si një përshkallëzim në luftën e saj në Ukrainë.
Trump ka mohuar kërkesat e Ukrainës për përdorimin e raketave me rreze të gjatë veprimi në të kaluarën, por është frustruar nga refuzimi i Presidentit rus Vladimir Putin për të arritur një marrëveshje paqeje.
Vance tha gjithashtu se pushtimi i Ukrainës nga Rusia ka ngecur me pak përfitime territoriale kohët e fundit, shkruan Reuters, transmeton Klankosova.tv.
●●●
LGSHKRIMI NGA
L. Ga.
Editorial nga Klan Kosova — ndjek lajme dhe zhvillimet e tjera kryesore të vendit.
