Vazhdojnë kërkimet për të riun që e zuri dheu në Shqipëri, ndihmon ushtria e Kosovës

Në Qafën e Burrelit prej 5 ditësh po vazhdojnë kërkimet për 29-vjeçarin Ardit Beshiri, i cili ishte duke punuar me ekskavator kur dheu e zuri poshtë pranë fabrikës së përpunimit të Kromit. Qeveria e Kosovës miratoi vendimin që ushtria të ndihmojë në këto kërkime. “Ministria e Mbrojtjes, mbi bazën e objektivave dhe planifikimeve strategjike për zgjerimin e kapaciteteve dhe vënies në detyrë të këtyre kapaciteteve është e përgatitur të mbështesë Shqipërinë me një kontingjent për nevoja humanitare, përkatësisht operacionin humanitar kërkimshpëtim, në vendin e quajtur “Qafa e Burrelit”, Bashkia Klos. Kjo mbështetje është në kuadër të partneritetit strategjik me shtetet mike e në veçanti me Shqipërinë, me këtë rast për mbështetje të autoriteteve të shtetit shqiptar” Në momentin e çarjes së rezervuarit mësohet se i riu ka qenë duke punuar në anën e poshtme. Vërshimi i ujit dhe materiali rërë që ishte grumbulluar nga përpunimi i kromit e ka marrë para dhe ende nuk dihet fati i tij, raporton Abcnews.al, transmeton Klankosova.tv. Ndërkohë policia ka arrestuar drejtuesin teknik të shoqërisë për shkelje të rregullave të mbrojtjes në punë, Ademir Lala.