Vdekja e 50 vjeçarit në Pejë: Dyshohet se u godit nga rryma e gjeneratorit

Një ngjarje e rëndë ka ndodhur pasditen e sotme në Pejë. Në Emergjencën e Spitalit, është dërguar një burrë i moshës 50 vjeçare. Mjekët e kanë konstatuar se ai kishte arritur pa shenja jete. Dyshohet se viktima u godit nga rryma. Për ngjarjen tragjike për Klankosova.tv ka folur prokurori i rastit, Dorjan Juniku. "Me të pranuar informacionin bashkë me policinë jam nisur drejt vendit të ngjarjes. Aty e kam bërë shikimin e vendit të ngjarjes dhe sipas informacioneve të para ai është goditur nga rryma, pasi që në atë betonjerën (punëtorinë) e cila gjendet në fshatin Gorazhdec, ka qenë duke punuar me gjenerator. Viktima në momentin kritik ka qenë duke u freskuar me ujë dhe e ka vendosur dorën mbi gjenerator, ku e ka gjuajtur rryma", deklaroi Juniku për Klankosova.tv. "Vdekjen e viktimës e ka konstatuar mjekët. Viktima është 50 vjeçar nga fshati Burojë i Skenderajt. Ajo se çka kemi konstatuar është se viktima nuk i ka pasur dorezat adekuate që përdoren për punë. Kam urdhëruar që trupi i pajetë i viktimës të dërgohet për obduksion në IML", theksoi ai. "Pronarin e kësaj betonjerës e kam ndalu për 48 orë. Nesër do të bëj kërkesë për sigurimin e prezencës fizike të të pandehurit në procedurën penale. Hetimet po zhvillohen dhe rasti është iniciuar si "Asgjësimi apo heqja e pajisjeve mbrojtëse dhe rrezikimi i sigurisë në vendin e punës"", tha prokurori i rastit për Klankosova.tv.