Vdekja e Fatos Nanos, Shqipëria të dielën në zi

Dita e diel, 2 nëntori është shpallur ditë zie kombëtare në Shqipëri, në nderim të ish kryeministrit Fatos Nano, i cili vdiq sot në moshën 73-vjeçare. Po të dielën do mbahen homazhet për Nanon, si dhe do të mbahet ceremonia mortore Njoftimi i Kryeministrisë shqiptare: Shpallja e Zisë Kombëtare në nderim të të ndjerit Fatos Nano, ish-Kryeministër, udhëheqës dhe politikan i shquar Këshilli i Ministrave ka vendosur shpalljen Zi Kombëtare ditën e diel, më 2 nëntor 2025, në nderim të Fatos Nanos, ish-Kryeministër dhe një prej figurave më të rëndësishme të politikës shqiptare. Në respekt të kontributit të tij të çmuar në jetën publike dhe politike të vendit, do të zhvillohet ceremonia funebre shtetërore dhe Homazhet Kombëtare për të ndjerin. Në të gjitha institucionet shtetërore dhe publike flamuri kombëtar do të ulet në gjysmë shtize. Në orën 12:00, në nderim të tij, do të ndërpriten të gjitha veprimtaritë dhe do të mbahet një minutë heshtje në mbarë vendin. Radiotelevizioni Publik Shqiptar gjatë zhvillimit të ceremonialit shtetëror, do të transmetojë muzikë funebre. Homazhet dhe Ceremonia Shtetërore Pallati i Kongreseve, Tiranë • 08:30 – 11:00 – Homazhe publike • 11:15 – 11:45 – Homazhe shtetërore dhe nderim nga personalitetet • 12:05 – Ceremonia funebre shtetërore e lamtumirës, shkruan Abcnews, transmeton Klankosova.tv.