Vdes iraniani që jetoi për 18 vite në Aeroportin e Parisit, inspiroi filmin “The Terminal”

Mehran Karimi Nasseri, një burrë iranian, jetesa në aeroportin “Charles de Gaulle” të Parisit e të cilit frymëzoi filmin e Steven Spielbergut “The Terminal”, vdiq nga një atak në zemër të shtunën në Terminalin 2F të aeroportit. Vdekja e tij u konfirmua nga Associated Press, e cila shkroi se policia dhe profesionistët mjekësorë përfundimisht nuk ishin në gjendje të shpëtonin Nasserin. Raporti tregon se zyrtarët deklaruan se Nasseri kishte jetuar sërish në aeroport javët e fundit, shkruan “Variety”, transmeton Klankosova.tv. Nasseri, i cili gjithashtu quhej “Sir Alfred”, jetonte në Terminalin 1 të Aeroportit “Charles de Gaulle”. Ai u vendos për herë të parë në hapësirat e aeroportit në vitin 1988 pasi Britania e Madhe i refuzoi atij azilin politik si refugjat, pavarësisht se kishte deklaruar se kishte nënën skoceze. Pasi u deklarua pa shtetësi, qëndrimi i tij në aeroport u bë një zgjedhje e qëllimshme. Thuhet se Nasseri gjithmonë e mbante bagazhin pranë tij, duke kaluar kohë duke lexuar, shkruar shënime në ditar dhe duke studiuar ekonomi. Ai u largua për herë të parë nga aeroporti kur u shtrua në spital në vitin 2006, 18 vjet pasi u vendos për herë të parë në terminal. Situata e tij jokonvencionale u bë frymëzim për filmin e Steven Spielbergut të vitit 2004 “The Terminal”, ku luan Tom Hanks si një burrë nga Evropa Lindore që banon në aeroportin “John F. Kennedy” të New Yorkut pasi iu refuzua hyrja në Shtetet e Bashkuara. Në vitin 2003, “New York Times” raportoi se Spielbergu kishte blerë të drejtat për historinë e jetës së Nasserit përmes kompanisë së tij të prodhimit “DreamWorks”, duke paguar afërsisht 250,000 dollarë. Nasseri shërbeu gjithashtu si frymëzim për filmin francez të vitit 1993 “Tombés du ciel”, me protagonist Jean Rochefort. I publikuar ndërkombëtarisht me titullin “Lost in Transit”, filmi ndoqi një burrë që qëndroi në një aeroport për disa ditë pasi humbi pasaportën. Përtej filmit narrativ, Nasseri ishte edhe objekt i shumë dokumentarëve dhe profileve gazetareske. Nasseri shkroi gjithashtu një autobiografi të titulluar “The Terminal Man”, botuar në 2004. Besohet se ka lindur në vitin 1945 në qytetin iranian të Masjed Soleiman. Nasseri ishte afërsisht 76 vjeç. /Klankosova