Kanchha Sherpa, anëtari i fundit i gjallë i ekipit që realizoi ngjitjen e parë të suksesshme në majën e Everestit në vitin 1953, ka vdekur në moshën 92 vjeçare.
Lajmin e ka bërë të ditur Shoqata e Alpinistëve të Nepalit, e cila e përshkroi Kanchha Sherpën si një “figurë historike dhe legjendare”. Ai vdiq të enjten në banesën e tij në Kapan, një lagje e distriktit Kathmandu, raporton "AlJazeera", transmeton Klankosova.tv.
“Na pikëllon thellësisht ndarja nga jeta e z. Kanchha Sherpa, i cili ishte dëshmitari i fundit i një kapitulli historik në alpinizëm. Do të na mungojë shumë”, u shpreh presidenti i shoqatës, Fur Gelje Sherpa.
Kanchha Sherpa ishte pjesë e ekipit prej 35 personash që ndihmuan Sir Edmund Hillary nga Zelanda e Re dhe udhërrëfyesin e tij Sherpa, Tenzing Norgay, të arrinin majën e Everestit më 29 maj 1953, duke u bërë njerëzit e parë që ngjiten në këtë majë 8,849 metra të lartë.
Ai ishte një nga tre Sherpat që arritën kampin final para ngjitjes përfundimtare të Hillary dhe Tenzing.
Në një intervistë për Associated Press në mars të vitit 2024, Kanchha tha se kurrë nuk kishte ngjitur vetë majën, pasi gruaja e tij i kishte kërkuar të mos rrezikonte jetën, sidomos pas humbjes së shumë miqve në ekspedita të tjera. Ai ndaloi edhe fëmijët e tij nga alpinizmi. /Klankosova.tv
●●●
ASHKRIMI NGA
A
Editorial nga Klan Kosova — ndjek lajme dhe zhvillimet e tjera kryesore të vendit.
