Vdiq në moshën 100-vjeçare fituesi më i moshuar i çmimit Nobel në botë

John Goodenough, fituesi më i vjetër i çmimit Nobel në botë, i cili luajti një rol vendimtar në zhvillimin e baterisë litium-jon, ka vdekur në moshën 100-vjeçare. Ai ndërroi jetë të dielën, sipas Universitetit të Teksasit në Austin, ku ai punonte si profesor inxhinieri. "Trashëgimia e John si një shkencëtar i shkëlqyer është e pamatshme", tha rektori i Universitetit të Teksasit në Austin, Jay Hartzell. Bateritë litium-jon fuqizojnë miliona automjete elektrike në mbarë globin. Universiteti i Teksasit e përshkroi atë si një "shërbëtor publik të përkushtuar, një mentor të kërkuar dhe një shpikës brilant por të përulur". Goodenough u nderua me çmimin Nobel në kimi në vitin 2019 në moshën 97-vjeçare për punën e tij në bateritë, duke përfshirë zhvillimin e baterisë litium-jon. Bateria e lehtë dhe e fuqishme ndezi një revolucion në teknologji, duke hapur rrugën për elektronikë moderne portative si laptopët dhe telefonat celularë. Bateritë luajnë gjithashtu një rol kritik në fuqizimin e pajisjeve më të mëdha moderne, duke përfshirë panelet diellore, shkruan BBC, përcjell Klankosova.tv I lindur në Gjermani në vitin 1922 nga prindër amerikanë, Goodenough u rrit në veri-lindje të ShBA-së dhe shërbeu në ushtrinë amerikane si meteorolog gjatë Luftës së Dytë Botërore. Ai diplomoi bachelor për matematikë në Universitetin Yale, si dhe doktoroi për fizikë në Universiteti i Çikagos. Zbulimet e tij "përmirësuan jetën e miliarda njerëzve në mbarë botën", tha Hartzell. "Ai ishte një lider në avantazhin e kërkimit shkencor gjatë shumë dekadave të karrierës së tij dhe ai kurrë nuk pushoi së kërkuari për zgjidhje inovative për ruajtjen e energjisë". Goodenough filloi karrierën e tij në Institutin e Teknologjisë në Masaçusets, ku punoi për 24 vjet dhe ndihmoi në zhvillimin e kujtesës me akses të rastësishëm për kompjuterin. Atje, ai u bë një nga themeluesit e teorisë moderne të magnetizmit, e cila ka luajtur një rol kryesor në fushën e telekomunikacionit. Kohët e fundit, Goodenough dhe ekipi i tij në Universitetin e Teksasit kishin hulumtuar mënyra të reja të ruajtjes së energjisë, duke përfshirë një bateri të bërë prej xhami. Rrini të informuar mbi zhvillimet kryesore duke u bërë pjesë e komunitetit tonë në Viber. BONUS: Merreni aplikacionin tonë në Android dhe iOS.