Vengu uron 16-vjetorin e anëtarësimit të Shqipërisë në NATO: Jemi më të fortë e më të angazhuar

Ministri i Mbrojtjes i Shqipërisë, Pirro Vengu, ka uruar sot 16-vjetorin e anëtarësimit të Shqipërisë në NATO më 5 prill të vitit 2009. Në një postim në Facebook, ai ka thënë se ky përvjetor e gjen Shqipërinë më të fortë, më të angazhuar dhe më të përkushtuar për sigurinë kombëtare dhe atë rajonale. "Për herë të parë, mbrojtja dhe siguria nuk kanë më mungesë investimesh në kapital njerëzor, në infrastrukturë apo në fuqi zjarri. Sfida jonë është t’i përdorim burimet financiare në rritje me zgjuarsi dhe qëndrueshmëri, duke zhvilluar industrinë ushtarake dhe ekonominë vendase". "Mirënjohës ndaj çdo efektivi të FA-së, familjeve të tyre, dhe çdo hallke të zinxhirit komandues që punon me përkushtim për Shqipërinë", ka thënë Vengu. /Klankosova.tv