Vetëvendosje kujton Mon Balajn dhe Arben Xheladinin, Albin Kurti: Me të drejtë kundërshtuam Pakon e Ahtisaarit (VIDEO)

Këtë të premte u bënë 16 vjet që kur nga protestat e përgjakshme të 10 shkurtit të 2007-ës, u vranë Mon Balaj e Arben Xheladini që protestonin kundër planit të Ahtisaarit. Pikërisht në vendin këta ranë, familjarë e ish-kolegë u mblodhën këtë  përvjetor. Krejt lanë lule e u përkulën pranë pllakës përkujtimore të tyre, por veç prijësi i dikurshëm që tashti është kryeministër vendi,  i tha ca fjalë për hallakamën e asaj dite, njofton Klan Kosova. Albin Kurti nuk duket aspak pishmanli për organizimin e atëhershëm, ku vdiqën dy e u plagosën rreth 80 njerëz. "Me të drejtë e kritikuam dhe kundërshtuam paketën e Ahtisaarit sepse aty kishte komuna të reja mbi baza etnike, zona serbizuese rreth kishave ortodokse, shuarje përfundimtare të trupave mbrojtëse”, tha Kurti. Familja Balaj në Podujevë e ajo Xheladini në Prishtinë, pritën në varreza familjarë e miq për nderime. Asnjërës e as tjetrës palë nuk iu zbeh shpresa për drejtësi. Në kuadër të aktiviteteve për përvjetorin e rënies së dy aktivistëve, Vetëvendosje shfaqi edhe një dokumentar që përkujton atë ngjarje. *Klikoni KËTU për t’u bërë pjesë e kanalit zyrtar të Klan Kosovës në Viber.