Vidhte vazhdimisht në lokalin që punonte, kapet 26-vjeçari në Durrës

Një 26-vjeçar i shpallur në kërkim për vjedhje të përsëritura në një lokal ku punonte, është kapur në Durrës. Sipas Policisë së Shqipërisë, A.D., ishte shpallur në kërkim pasi Gjykata e Juridiksionit të Përgjithshëm Durrës, me vendimin të 3 korrikut, i ka caktuar masën e sigurisë “Arrest me burg”, për veprën penale “Vjedhja”. Nga hetimet ka rezultuar se 26-vjeçari, gjatë kohës që punonte në një lokal në pronësi të një shtetasi tjetër, ka përvetësuar në mënyrë të përsëritur shuma parash nga xhirimet ditore të lokalit. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.