Vietnami do të ndjekë penalisht gazetarin për aktivitete anti-shtetërore

Policia në Vietnam po ndjek penalisht një gazetar dhe redaktor të faqes së lajmeve me bazë në Berlin, i njohur për raportet kritike rreth udhëheqësve të kombit të Azisë Juglindore, duke e akuzuar atë për aktivitete anti-shtetërore, thanë autoritetet. Pavarësisht reformës së gjerë ekonomike dhe rritjes së hapjes ndaj ndryshimeve shoqërore, Partia Komuniste në pushtet e Vietnamit mban censurë të rreptë mediatike dhe toleron pak kritika, veçanërisht në prag të kongresit të saj pesëvjeçar, i cili është caktuar për në janar, raporton Reuters, transmeton Klankosova.tv. Gazetari, Le Trung Khoa, 54 vjeç, u akuzua për "bërje, ruajtje, përhapje informacioni, materialesh, sendesh me qëllim kundërshtimin e shtetit", tha ministria e sigurisë publike e Vietnamit në një deklaratë të hënën. Autoritetet kanë miratuar vendimin për të ndjekur penalisht Khoa-n dhe një urdhër për ta arrestuar atë, shtoi ajo. Khoa, kryeredaktor i faqes së lajmeve Thoibao.de, tha të martën se përpjekja për ta ndjekur penalisht ishte një "farsë" qeveritare dhe pjesë e strategjisë së saj kundër faqes së lajmeve, e cila nuk mund të aksesohet nga Vietnami dhe nuk i nënshtrohet censurës së saj. Ministria tha se Khoa mban një pasaportë vietnameze. Në llogarinë e tij në rrjetet sociale, Khoa tha se ai ishte gjithashtu gjerman.