Vitia bën thirrje të shmangen iftaret me miq: Kush më mirë se besimtarët e di vlerën e sakrificës?

Ministri në detyrë i Shëndetësisë, Arben Vitia, tha se askush më mirë se besimtarët nuk ia di vlerën sakrificës, prandaj ka bërë thirrje që këtë Ramazan t’i respektojnë rregullat e institucioneve. Ai tha se shpreson që kujdesi do të jetë më i madh që të mos shtohen rastet e sëmundjeve, njofton Klan Kosova. Statusi i plotë: Sonte është syfyri i parë i muajit të madhërishëm të Ramazanit. Të gjithë besimtarëve të vendit tim, shqiptarëve myslimanë e atyre në të gjithë botën, u qoftë i mbarë e i lehtë! U bëfshim të devotshëm si ju, Të sakrificës si ju! Këtë vit mbrëmjet e iftaret nuk do të jenë si çdo vit. Po kush më mirë se besimtarët e di vlerën e formën e sakrificës? Agjërimin këtë vit na duhet ta shoqërojmë me rregulla që na mbajnë larg fizikisht e nuk na lejojnë të mblidhemi as brenda familjeve. Mbes besimplotë se në këtë muaj, kujdesi juaj do të jetë edhe më i madh që mos të na shtohen rastet e të sëmurëve assesi. Qofshi vullnetplotë këtë muaj, e lartësofshim të mirën e të mbarën siç po e lartësoni besimin tuaj!