Vrasja e prizrenasit pas përleshjes së qenve, aktakuzë ndaj Erolind Badallit

Prokuroria Themelore në Prizren, Departamenti i Krimeve të Rënda, ka ngritur aktakuzë kundër Erolind Badallit, i cili gjendet nën masën e paraburgimit për vrasjen e Hekuran Shalës, më 10 gusht, në Prizren, raporton Klankosova.tv Ndaj Shalës, rëndon akuza se natën kritike, rreth orës 20:30, në lagjen “Tusus”, në rrugën “Lapidari” , me dashje dhe në mënyrë dinake duke shfrytëzuar besimin e viktimës H.Sh., të njëjtin e privon nga jeta. "Ngjarja ka ndodhur pas organizimit të një përleshjeje mes qenve, ku pas përfundimit të saj, viktima ishte duke u larguar nga vendi i ngjarjes. I pandehuri e ka ndjekur atë dhe më pas, duke përdorur një mjet të mprehtë – thikë, e ka sulmuar papritur viktimën duke e goditur tri herë në pjesë të ndryshme të trupit. Sipas ekspertizës mjeko-ligjore të autopsisë të datës 22.09.2025, lëndimet kanë shkaktuar gjakderdhje të brendshme të rëndë në regjionin e majtë të kraharorit, e cila ka rezultuar me vdekjen e viktimës. Gjithashtu, i pandehuri E.B., ka poseduar pa leje valide armën e ftohtë – thikën me gjatësi tehu prej 10 cm dhe dorezë 12 cm, me të cilën i ka shkaktuar vdekjen viktimës H.Sh." - thuhet në njoftim. Me këto veprime i njëjti ka kryer veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve” sipas KPRK-së. Sa i përket veprës penale "Keqtrajtimi i kafshëve dhe ndotja e ushqimit dhe e ujit të shtazëve", rasti është duke u trajtuar nga Departamenti i Përgjithshëm, në kuadër të procedurave hetimore përkatëse, ndaj dy të dyshuarve tjerë, të cilët kanë organizuar luftën me qen./Klankosova.tv   https://klankosova.tv/fillimisht-i-nxiten-qente-ne-perleshje-prokuroria-jep-detaje-per-vrasjen-ne-prizren/   https://klankosova.tv/viktima-se-ka-pritur-goditjen-pasi-ata-ishin-shoke-paraburgoset-i-dyshuari-per-vrasjen-ne-prizr1en/