Zbulohen topa guri në një varr në Skoci, besohet se datojnë 4 mijë vjet më parë

Dy topa misteriozë prej guri të lëmuar që mendohet se datojnë më shumë se 4 mijë vjet më parë, janë zbuluar në një varr në Sanday, në Ishujt Orkney të Skocisë. Topat ishin rreth pesë centimetra në diametër, dhe u gjetën në njërën nga dhomat e shumta të varrit, i cili qëndronte mbi një shkëmb që po shkërmoqej ngadalë në det. Qëllimi i topave është i paqartë por disa arkeologë mendojnë se ata janë përdorur si armë, sende ceremoniale, pajisje për tregimin e pasurisë, mjete të përpunimit të lëkurës ose për të lëvizur blloqe ndërtimi, shkruan Dailymail, përcjell Klankosova.tv Rreth një milje në veri të varrit, në Cata Sand, ekipi ka zbuluar gjithashtu mbetjet e një vendbanimi neolitik që daton në të njëjtën kohë me monumentin. Krahas topave prej guri, gërmimet e studiuesve kanë zbuluar edhe mbetje të ndryshme njerëzore dhe kafshësh, qeramikë dhe artefakte të ndryshme prej guri.