Zelensky: Rusia po përgatit sulme të reja përpara bisedimeve të paqes në Gjenevë

Presidenti ukrainas Volodymyr Zelensky tha të hënën se inteligjenca tregonte se Rusia po përgatiste sulme të reja ndaj objektivave energjetikë, duke paralajmëruar se sulme të tilla do ta bënin më të vështirë arritjen e një marrëveshjeje për t'i dhënë fund luftës gati katërvjeçare. Paralajmërimi vjen përpara raundit të tretë të bisedimeve të paqes në Gjenevë, të cilat fillojnë të martën me ndërmjetësimin e Shteteve të Bashkuara, shkruan Reuters . "Raportet e inteligjencës tregojnë se Rusia po përgatit sulme të mëtejshme masive ndaj infrastrukturës energjetike, kështu që ne duhet të sigurohemi që të gjitha sistemet e mbrojtjes ajrore të vendosen siç duhet", tha Zelensky në fjalimin e tij të përditshëm me video. Ai shtoi se sulmet ruse "janë në zhvillim të vazhdueshëm" dhe përdorin një kombinim armësh, duke përfshirë dronë dhe raketa, gjë që kërkon "mbrojtje dhe mbështetje të veçantë nga partnerët tanë". "Rusia nuk mund t'i rezistojë tundimit për t'u shkaktuar një goditje të dhimbshme ukrainasve në ditët e fundit të dimrit", tha ai. "Partnerët duhet ta kuptojnë këtë. Kjo vlen, para së gjithash, për Shtetet e Bashkuara”. Negociatat në Gjenevë Delegacionet ukrainase, ruse dhe amerikane po mblidhen në qytetin zviceran për një raund të tretë bisedimesh që do të përqendrohen për herë të parë në çështjen më të ndjeshme të luftës - fatin e territorit ukrainas të pushtuar nga Rusia. Kreu i delegacionit ukrainas, Rustem Umerov, njoftoi në Telegram se ekipi i tij kishte mbërritur tashmë në Gjenevë dhe shpresonte për "punë konstruktive dhe takime thelbësore mbi çështjet e sigurisë dhe humanitare". Moska dëshiron të flasë për territorin Moska po kërkon që Ukraina t’ia lëshojë të gjithë Donbasin. Kremlini konfirmoi se delegacioni rus do të udhëhiqet nga Vladimir Medinsky, një ndihmës i Presidentit Vladimir Putin. “Këtë herë kemi ndërmend të diskutojmë një gamë më të gjerë temash, duke përfshirë ato kryesore. Dhe çështjet kryesore kanë të bëjnë me territorin dhe të gjitha kërkesat tona të tjera”, u tha gazetarëve zëdhënësi i Kremlinit, Dmitry Peskov. Dy raunde të mëparshme bisedimesh të ndërmjetësuara nga SHBA-të u mbajtën në Emiratet e Bashkuara Arabe dhe rezultuan në një shkëmbim të të burgosurve, por pa përparim të rëndësishëm drejt një marrëveshjeje përfundimtare. /Klankosova.tv