Zemaj paralajmëron masa të reja nëse vazhdon rritja e rasteve

Ministri i Shëndetësisë, Armend Zemaj, ka thënë që nëse vazhdon rritja e rasteve me COVID-19, do të ketë masa të reja kufizuese. "Nëse bazohemi në statistika dhe në trendin, se si është ndjekur infeksioni pas muajit korrik dhe gusht, stabilizimi skajshmërisht i mirë që erdhi në fillim të shtatorit. Në analizat e brendshme që ne bëjmë, është një tregues që në disa aspekte, sidomos në kryeqytet rritja e infeksionit e ka tejkaluar 50% pothuajse çdo ditë, sidomos në dy javët e fundit". Zemaj në Rubikon në Klan Kosova, ka theksuar që shkak i rritjes së numrit të rasteve, është mospërgjegjshmëria e qytetarëve. "Mendoj që është mosdiciplina edhe individuale edhe institucionale. Niveli i infeksionit në institucionet publike, por edhe në ato private është tregues i qartë, që njerëzit nuk po janë të kujdesshëm dhe nuk e vendosin maskën. Edhe pse Kosova, në trendin që ne përcjellim,  akoma jemi në limitet e vijës së gjelbër për kokë banori. Ky dyjavor për ne me statistika është i njëjtë, pavarësisht numrit që edhe dje e sot kemi mbi 280 raste me Covid". Zemaj ka theksuar se po punojnë që të ndërmarrim masa dhe sipas tij, është e domosdoshme që të intervenojmë sidomos në Prishtinë. "Nuk mund të lejojmë pavarësisht trendit të hapjes së nevojës që kemi për lëvizje, ekonomi, edhe për zhvillim të jetës normale. Do të ndërmarrim masa në kufizim të grumbullimeve (aktivitet qofshin private ose publike), do ta reduktojmë numrin në adminstratën qendrore apo lokale, do të ketë kufizim të kohës së zhvillimit të veprimtarive sidomos në gastronomi dhe të aktiviteteve kulturore dhe sportive".