Zemaj takon drejtorët e spitaleve të përgjithshme si dhe të SHSKUK-së, kërkon më shumë përgjegjegjësi nga personeli shëndetësor

Ministri i Shëndetësisë Armend Zemaj, ka takuar sot drejtorët e spitaleve të përgjithshme të Shërbimit Spitalor Universitar të Kosovës. Ky zhvillim vie që Ministri Zemaj të njihet nga afër për gjendjen dhe nivelin e përgatitjes që kanë bërë në kuadër të luftës antikovid, njofton Klan Kosova. ''Kam takuar drejtorët e spitaleve të përgjithshme si dhe të ShSKUK-së, për t’u njohur me gjendjen e spitaleve si dhe përgatitjet për situatën epidemiologjike. Tash për tash, situata në spitalet tona është stabile, por, jemi të vëmendshëm''. Zemaj ndër tjera ka theksuar se përkundër situatës epidemiologjike, përkujdesja nga personeli shëndetësorë ndaj pacientëve nuk duhet të mungojë, njofton Klan Kosova. ''Përkujdesja shëndetësore nuk guxon të mungojë, për shkak të virusit. Asnjë kufizim i trajtimit të pacientëve nuk mund të bëhet në spitale e as QKUK. Spitalet e përgjithshme në asnjë moment nuk mund ta ngarkojnë QKUK-në, duke udhëzuar rastet. Pacientët që mund të marrin trajtimin e duhur në spitalet rajonale, duhet të mbesin aty. Llogaridhënia me transparencën janë të pandashme në punën tonë ditore, ky është edhe detyrimi i secilit menaxher e drejtues në sektorin publik''. Më tej Ministri Zemaj ka kërkuar më shumë përgjegjësi nga udhëheqësit e spitaleve, në mënyrë që ritmi i punës dhe efikasiteti të vërehet në mënyrën më të mirë tek shëndeti i pacientëve. ''Tashmë kur po hyjmë në një fazë të re të përgjegjësisë, pres nga secili përgjegjës që të jetë në nivelin e duhur, rritmi i punës nuk do të ulet, puna do të vazhdoj me përkushtim të shtuar. Kemi shtuar edhe 200 mjekë si dhe 375 staf mbështetës të fushave të ndryshme, ndërsa në specializime edhe rreth 1500 mjekë të tjerë. Bashkë ia dalim!''.