Zjarri dëmtoi edhe QMF-në, policia në kërkim të të dyshuarit - detaje nga incidenti në Rahovec

Policia ka dhënë detaje rreth incidentit me zjarr që ndodhi në orët e para të ditës së sotme në fshatin Ratkoc të Rahovecit. Zëdhënësi i policisë për rajonin e Gjakovës, Sheremet Elezaj, tha për Klankosova.tv se zjarri ka përfshirë dhe ka djegur një autoambulancë në Qendrën e Mjekësisë Familjare të fshatit. Ai shtoi se si pasojë e flakëve janë shkaktuar dëme edhe në objektin e QMF-së, derisa theksoi se një person i dyshuar është në kërkim. “Rreth orës 02:40 është raportuar për një incident zjarri në fshatin Ratkoc-Rahovec. Njësitet policore dhe zjarrfikësit kanë dalë menjëherë në vendin e ngjarjes, ku zjarri kishte përfshirë dhe djegur një autoambulancë në Qendrën e Mjekësisë Familjare. Si pasojë e zjarrit janë shkaktuar dëme edhe në objektin e QMF-së. Zjarri është lokalizuar dhe nuk ka pasur pasoja për njerëzit. Në konsultim me Prokurorin e Shtetit, rasti është iniciuar si “zjarrvënie”. Lidhur me rastin, jemi në kërkim të një personi të dyshuar dhe po ndërmerren veprimet e nevojshme hetimore për zbardhjen e plotë të rrethanave të ngjarjes”, tha Elezaj për Klankosova.tv. https://klankosova.tv/zjarr-ne-rahovec-dyshohet-se-nje-person-ia-vuri-flaken-autoambulances-foto111/