Zvogëlohet lista e pritjes për Rezonancë Magnetike në QKUK

QKUK njofton se është zvogëluar lista e pritjes për raste ambulantore për Rezonancë Magnetike (MRI) në Klinikën e Radiologjisë, në vetëm 3 muaj e gjysmë, nga më shumë se një vit sa ishte më parë, përderisa për pacientët e shtrirë në klinika, nuk ka fare listë të pritjes. Sipas raportit 9- mujor të punës, në Klinikën e Radiologjisë janë kryer 9 mijë e 683 Rezonanca Magnetike, 23 mijë e 751 pacientë në Tomografi të Kompjuterizuar (CT). Poashtu bëhet e ditur se brenda muajit, në këtë klinikë, u kryen 12 mijë e 500 deri në 14 mijë ekzaminime të ndryshme diagnostike për pacientët, transmeton Klankosova.tv. Qendra Klinike Universitare e Kosovës, njofton se aktualisht ka në funksion 3 Rezonanca Magnetike, gjë që ka mundësuar që të bëhet reduktimi i listave të pritjes. Këtë reduktim e ka ndihmuar edhe instalimi i aparatit të Rezonancës Magnetike në Spitalin e Pejës.