Rikthimi në skenë i Celine Dion po konsiderohet si një nga momentet më emocionuese të muzikës ndërkombëtare këtë vit

Pas një mungese katërvjeçare për shkak të problemeve serioze shëndetësore, artistja ikonike ka konfirmuar se do të rikthehet me një seri prej 10 koncertesh në arenën Paris La Défense Arena, një nga hapësirat më të mëdha të koncerteve në Evropë.

Këngëtarja, e njohur për hite të pavdekshme si “My Heart Will Go On” dhe “Because You Loved Me”, ndau lajmin në ditëlindjen e saj të 58-të, duke e cilësuar rikthimin si një moment thellësisht personal dhe një fitore të madhe. Në një mesazh për fansat, ajo u shpreh se ndihet më e fortë dhe më e përgatitur për të përballuar këtë kapitull të ri të karrierës së saj.

Dion ka kaluar vite sfiduese pasi u diagnostikua me Sindromën e Personit të Ngurtë, një sëmundje e rrallë neurologjike që ndikon në muskujt dhe lëvizjen. Megjithatë, ajo tregoi se progresi i saj është i dukshëm: ka rifilluar të këndojë dhe madje të bëjë lëvizje të lehta kërcimi.

Koncertet do të mbahen gjatë muajve shtator dhe tetor, me intervale pushimi mes tyre për të ruajtur shëndetin e artistes. Biletat pritet të dalin në shitje më 7 prill, ndërsa interesi i publikut është tashmë shumë i lartë.

Rikthimi i saj shënon fundin e një periudhe të gjatë pasigurie, që nisi pas ndërprerjes së turneut “Courage” në vitin 2020, fillimisht për shkak të pandemisë dhe më pas për arsye shëndetësore.