Kryetari i Mitrovicës, Faton Peci, ka lundruar në Liqenin Akumulues të këtij qyteti, duke theksuar gjendjen e rënduar që ka pushtuar këtë liqen.

Ai ka shprehur shqetësimin e tij për gjendjen aktuale dhe ka deklaruar se tashmë janë në fazën e hartimit të një plani për liqenin, me qëllim të rivitalizimit të këtij vendi të bukur.

Sipas Pecit, gjendja e liqenit ka qenë tejet e rënduar në dy vitet e fundit, duke bërë të nevojshme ndërmarrjen e masave për pastrimin dhe zhvillimin e tij.

Në funksion të kësaj, së bashku me Klubin e Zhytjes Trepça, kemi realizuar disa aktivitete të pastrimit, duke synuar të rivendosim bukurinë dhe pastërtinë e këtij liqeni.

Jemi në fazën e hartimit të një plani për liqenin, si njërin nga vendet më të bukura në Kosovë, me potencial të madh për zhvillim të turizmit dhe shndërrimin e tij në një pikë të rëndësishme atraksioni, ka shkruar Peci në një deklaratë për shtyp.

Ky plan synon të përfshijë masa për mbrojtjen e mjedisit, zhvillimin e infrastrukturës dhe promovimin e liqenit si destinacion turistik, duke synuar të tërheqë vizitorë nga e gjithë Kosova dhe jashtë saj.