“I mbaj për qejfin tim. Më shumë kam shpenzime se sa fitim, por jam i kënaqur”, thotë Hysni Rexhaj nga Osekhyla e Gjakovës, i cili jeton me 6 ujq dhe me shumë kafshë e shpezë të tjera të egra.

Hysni Rexhaj la jetën e mirë Zvicër për jetuar në mesin e gjashtë ujqve në fshatin Osekhylë të Gjakovës. Ai thotë se mbajtjen e kafshëve të egra e kishte pasion që nga mosha e fëmijërisë.

Rexhaj, i cili merret me rritjen e ujqve, i ka vënë njërit prej ujqve të tij mbiemrin e presidentit amerikan, Trump. “Këtë emër ja kom ngjitë si lloj falënderimi për Amerikën që na ka ndihmu, ka kontribu në kohën e luftës. Ata kanë bo shumë për neve. Po ashtu ky është origjinal dhe i bukur dhe për atë arsye ja kam vënë edhe emrin”, thotë Rexhaj për Albinfo.ch.

Nuk është e lehtë të punosh me ujq

Ai shton se është goxha e vështirë për t’i mbajtur gjashtë ujq, por ai këtë e bën me dëshirë. “Për me u marrë me ujkun është bukur vështirë se duhet edhe pak me qenë talent se nuk mundet edhe gjithsekush me bo këtë punë. Unë i bëj do sende çka s`i bëjnë tjerët, jam i kënaqur që i kam këta gjashtë bukurosh, sepse janë shumë të afërt”, thekson Rexhaj.

Burri nga Gjakova që u rikthye pas luftës nga Zvicra në Kosovë, potencon se e kishte ëndërr të jetonte me ujq.

“Ëndrra ime u konë me e bo këtë kopsht zoologjik. Por këtu kërkohen do kushte, nuk është kollaj me i mbajt edhe brenda sepse këta dojnë edhe ushqim edhe mirëmbajtje. Jam shumë i dashuruar në ta. Ua kam dhanë njëfarë trajnimi kështu që ata janë të qetë dhe të relaksuar. Për momentin i kam gjashtë”, thotë Rexhaj.

4 ujq i ka zënë vetë me dorë

Ai pastaj tregon për albinfo.ch se ku i marrë ujqit.

“Disa i kam zënë, e disa i kam ble. Katër i kam zënë me dorë. Kam dashuri ndaj tyre e këta kanë ndaj meje”, sqaron Rexhaj.

Hysniu, në kopshtin e tij zoologjik tani ka 2500 kafshë e shpezë të ndryshme. Mes tyre: 6 ujq, mace të egra, dhelpra e deri te shpezët si: shqiponja, fëllënza e çka jo tjetër. Kështu, në fshatin Osekhylë të Gjakovës tani jeton familja tetë anëtarëshe e Hysni Rexhajt, që merret me rritjen e qindrave shpezëve dhe shtazëve të egra.

Rexhaj kujdeset për kafshë dhe shpezë që nga mosha 6-vjeçare. Për punën që bën, ai thotë se nuk është punë e lehtë dhe ka shpenzime.

“Më shumë i mbaj për qejfin tim, më shumë kam shpenzime se sa fitim me i mbajt, por jam i kënaqur”, përfundon Rexhaj.

Një kopsht i vërtetë zoologjik

Në kopshtin e tij zoologjik, pos ujqve, mund të hasësh mace të egra, dhelpra e deri te shpezët, si shqiponja, fëllënza e çfarë jo tjetër. Ai kërkon ndihmë nga institucionet për zgjerimin e kopshtit zoologjik.

Duhen kushte

“Këtu kërkohen do kushte, nuk është kollaj me i mbajt edhe brenda, sepse këta donë edhe ushqim, edhe mirëmbajtje. Jam shumë i dashuruar në ta. Ua kam dhanë njëfarë trajnimi këshu që ata janë të qetë dhe të relaksuar.