Superylli portugez Cristiano Ronaldo nuk ka luajtur në tri ndeshjet e fundit për klubin e tij.
Sonte, Al-Fateh pret Al-Nassr në javën e 22-të të Saudi Pro League, në stadiumin “Al Fateh Club Stadium” në Al Hofuf, Arabinë Saudite, me fillim nga ora 18:30.
Fokusi kryesor do të jetë sërish te Ronaldo, pasi sulmuesi ka munguar në dy ndeshjet e fundit të kampionatit dhe gjithashtu në fitoren 1-0 ndaj Arkadag në fazën e 1/16 të AFC Champions League Two.
Ditët e fundit ai është lidhur edhe me një rikthim sensacional te klubi i fëmijërisë, Sporting CP.
Pavarësisht mungesës së tij, Al-Nassr ka vazhduar të fitojë ndaj Al-Riyadh dhe Al-Ittihad, duke u renditur aktualisht në vendin e tretë me 49 pikë dhe një ndeshje më pak, ndërsa kryesuesit Al Hilal kanë 53 pikë në 21 ndeshje.
Ronaldo ende nuk ka fituar një trofe të madh që nga transferimi në Al-Nassr në vitin 2023, por me ekipin në garë për dy trofe këtë sezon, rikthimi i tij në këtë fazë vendimtare është shumë i rëndësishëm.
Edhe pse ka munguar në disa ndeshje, ai ka qenë i pranishëm në stërvitje dhe është plotësisht i gatshëm.
Raportimet e kësaj jave sugjerojnë se do të rikthehet në formacion sonte ndaj Al-Fateh, gjë që u konfirmua edhe pasi u pa duke udhëtuar me ekipin.
Me ëndrrën për të arritur 1000 gola në karrierë, Ronaldo do të jetë i etur të rikthehet te golat dhe të ndihmojë ekipin të marrë tre pikë shumë të rëndësishme.
Aktualisht ai ka 17 gola dhe 1 asist në 18 ndeshje të Saudi Pro League këtë sezon./GazetaExpress/
