Alessandro Bastoni është gjendur në qendër të polemikave pas “Derby d’Italia” të së shtunës mbrëma, por mbrojtësi i Interit nuk pritet të ndëshkohet në mënyrë retrospektive për simulimin që çoi në përjashtimin e Pierre Kalulu të Juventusit. Ja pse.

Inter mori tri pikët në “Derby d’Italia” falë një autogoli të Andrea Cambiaso dhe golave individualë nga Pio Esposito dhe Piotr Zielinski. Për Juventusin realizuan Cambiaso dhe Manuel Locatelli.

Ndeshja nuk kaloi pa polemika. Mbrojtësi i Juventusit, Kalulu, u përjashtua në minutën e 42-të pas kartonit të dytë të verdhë.

Mediat italiane e përshkruan kartonin e parë si “të tepruar” dhe të dytin si “joekzistent” dhe “absurd”, pasi Bastoni simuloi për të nxitur përjashtimin e kundërshtarit, duke bindur gjyqtarin Federico La Penna.

Meqë bëhej fjalë për karton të dytë të verdhë dhe jo të kuq direkt, VAR nuk kishte të drejtë të ndërhynte.

Raportimet e së dielës sugjerojnë se kjo është një rregull që IFAB synon ta ndryshojë sa më shpejt.

Përzgjedhësi i gjyqtarëve Gianluca Rocchi pranoi më pas se La Penna gaboi dhe kërkoi falje për gabimin.

Për ta bërë situatën edhe më të hidhur për Juventusin, Bastoni kishte vetë një karton të verdhë në momentin e përjashtimit të Kalulu; nëse do të ndëshkohej për simulim, Interi do të mbetej me 10 lojtarë në vend të Juventusit.

Situata u tensionua edhe më shumë nga festimi i zjarrtë i Bastonit pasi gjyqtari nxori kartonët ndaj Kalulu.

Megjithatë, Bastoni nuk pritet të marrë ndëshkim shtesë. Arsyeja lidhet me një rregull të ngjashëm me atë që pengoi ndërhyrjen e VAR-it: autoritetet mund të rishikojnë pamjet televizive vetëm në raste të caktuara kur bëhet fjalë për sjellje josportive.

Sipas nenit 61 të Kodit të Drejtësisë Sportive, gjyqtari sportiv mund të përdorë pamjet TV vetëm në katër raste:

Simulim që çon në dhënien e një penalltie për ekipin e lojtarit që simulon;

Simulim që çon në përjashtimin direkt të një kundërshtari;

Shënim goli me prekje të qëllimshme me dorë;

Parandalim i një goli me prekje të qëllimshme me dorë.

Meqë Kalulu u përjashtua për karton të dytë të verdhë dhe jo për të kuq direkt, veprimi i Bastonit nuk hyn në asnjë nga këto kategori dhe nuk do të shqyrtohet nga gjyqtari sportiv./GazetaExpress/