Lionel Messi po vazhdon të lërë gjurmë në futbollin botëror.
Ylli argjentinas u bë veç lojtari i dytë që e arrin shifrën e 900 golave në ndeshje zyrtare.
Tetë herë fituesi i Topit të Artë shënoi mbrëmë në barazimin 1:1 të Inter Miamit ndaj Nashville në rrethin e dytë të Concacaf Champions Cup, shkruan “Gazeta Express”.
Loja e parë kishte përfunduar 0:0, që nënkupton se Inter Miami u eliminua shkaku i rregullave të golit të mysafirit.
Kampioni i botës me Argjentinën iu bashkua Cristiano Ronaldos, i cili deri tash ishte lojtari i parë dhe i vetëm që i ka shënuar 900 gola në karrierë.
Këtë arritje, ylli portugez e kishte bërë në shtator të vitit 2024.
Ronaldo i ka realizuar 965 gola dhe e ka bërë të qartë se synon ta arrijë shifrën e 1000 golave.
Por, pse të mos e synojë edhe Messi këtë shifër? Pra, atij i duhen edhe 100 gola.
Messit iu nevojitën 1,142 ndeshje për t’i shënuar 900 gola, kurse Ronaldos iu deshën 1,236 ndeshje për ta kaput 900 golëshin.
Legjenda braziliane Pele e zë vendin e tretë në listën e golashënuesve më të mirë në histori me 765 gola, ndonëse pretendonte se i kishte mbi 1000 gola.
Sa u përket lojtarëve aktivë, ylli i Barcelonës, Robert Lewandowski është larg Ronaldos e Messit me 690 gola.
Messi kishte debutuar me Barcelonën më 16 tetor të vitit 2004.
Pjesën më të madhe të golave i ka shënuar në Spanjë me gjigantin katalunas.
Ai i ka realizuar 672 gola me “Blaugrana”, ndërsa i ka shtuar edhe 81 me Inter Miamin dhe 32 me Paris Saint-Germainin.
Kurse, me Kombëtaren e Argjentinas i ka shënuar 115 gola.
Viti më brilant i Messit në karrierë ishte ai 2012, kur i shënonte 91 gola me Barcelonën dhe Argjentinën në 69 ndeshje të zhvilluara, prej tyre 79 me katalunasit dhe 12 me kampionët e botës.
Messi njihet po ashtu si futbollisti që i ka shënuar më së shpejti 100 gola në Ligën e Kampionëve, më saktësisht pas 123 ndeshjesh. /Gazeta Express
