Lamine Yamal ka marrë me shpejtësi statusin e një sensacioni global në futboll, duke fituar admirimin e tifozëve për paraqitjet e tij spektakolare si me Barcelonën, ashtu edhe me Kombëtaren e Spanjës. Talenti adoleshent ishte vendimtar në triumfin e Spanjës në Euro 2024 dhe vazhdoi me një sezon të jashtëzakonshëm në nivel klubesh, ku ndihmoi Barcelonën të fitojë tripletën vendase.
Gjatë sezonit 2024-25, 18-vjeçari zhvilloi 55 ndeshje zyrtare me Barcelonën, duke shënuar 18 gola dhe asistuar 25 herë në të gjitha kompeticionet. Me këto statistika mbresëlënëse dhe trofe në bagazh, Yamal tashmë po përmendet si një nga kandidatët kryesorë për Topin e Artë të këtij viti.
Megjithatë, pavarësisht lavdërimeve të shumta, Yamal nuk ka shpëtuar nga kritikat. Ish-reprezentuesi francez dhe fitues i Kupës së Botës 2018, Adil Rami, ka shpërthyer në një deklaratë të ashpër kundër të riut. Gjatë një paraqitjeje në Instant Foot, Rami jo vetëm që kritikoi personalitetin e Yamalit, por shkoi aq larg sa të ofendonte edhe nënën e tij – një veprim që shkaktoi zemërim të gjerë në publik.
“Kanë kaluar vetëm dy muaj, por si person nuk e duroj dot më,” tha Rami. “Futbollistikisht është i jashtëzakonshëm. Do të fitojë Topa të Artë, Championsa, gjithçka. Por si njeri, jam lodhur. Po flas sinqerisht, nuk jam këtu për të kënaqur tifozët e Barcelonës apo dikë tjetër.”
Rami përmendi një moment specifik që e bëri të humbasë respektin për Yamalin – përshëndetja me Cristiano Ronaldon gjatë finales së Ligës së Kombeve mes Spanjës dhe Portugalisë. Më pas, Yamal postoi video dhe mesazhe për Ronaldon, gjë që sipas Ramit ishte "irrituese".
"Ajo që më acaroi më shumë ishte mënyra si e përshëndeti Ronaldon. Pastaj postoi video për të – ato më bezdisën shumë,” shtoi ai.
Kritikat e Ramit shkuan përtej fushës së futbollit. Ai sulmoi stilin e veshjes së Yamalit, jetën e natës dhe marrëdhëniet e përfolura, duke sugjeruar se lojtari po merr një stil jetese tepër “amerikanizuar” që nuk përputhet me traditat e futbollit.
“Ecën me pantallonat gjysmë poshtë, stoliset me bizhuteri të mëdha, sillet si superyll. Ai stil ka një histori, e di çfarë përfaqëson?” pyeti Rami. “Tani po kalon netët nëpër festa, po bën bujë. Ka marrë fanellën me numër 10, mbushur me diamante si në Hollywood. Është e frustruese.”
Këto deklarata ndezën debat në rrjetet sociale. Disa i dhanë të drejtë Ramit duke thënë se yjet e rinj duhet të jenë të kujdesshëm me imazhin publik, ndërsa të tjerë e konsideruan deklaratën si të tepruar dhe personale, veçanërisht ofendimet. Ndërkohë, Yamal vazhdon të japë përgjigjen më të mirë në fushë, i pashqetësuar nga zhurma, duke u ngjitur gjithnjë e më lart në skenën ndërkombëtare të futbollit.
