Agjentë të FBI ndodhen në Havana për të hetuar një incident me armë zjarri që ndodhi në fund të shkurtit mes rojës bregdetare kubane dhe një skafi me regjistrim nga Florida.

ajmi u konfirmua nga një zyrtar i ambasadës së Shtetet e Bashkuara të Amerikës në Havana, i cili foli në kushte anonimiteti për agjencinë Agence France-Presse. Sipas tij, ekipi i FBI mbërriti të martën në Kubë në kuadër të një hetimi të pavarur mbi ngjarjen.

Zëdhënësi i ambasadës nuk dha detaje të mëtejshme mbi praninë e agjentëve në ishull, në një kohë kur marrëdhëniet mes SHBA dhe qeverisë kubane mbeten të tensionuara.

Sipas autoriteteve kubane, më 25 shkurt një anije e rojës bregdetare iu afrua një skafi për verifikim, por personat në bord reaguan duke hapur zjarr.

Autoritetet në Kuba e kanë cilësuar incidentin si një tentativë “infiltrimi me qëllime terroriste” nga një grup i armatosur, ka transmetuar Panorama.

Si pasojë e përplasjes, katër persona në skaf u vranë në vend, ndërsa një i pestë ndërroi jetë disa ditë më vonë nga plagët. Pesë të tjerë janë arrestuar dhe përballen me akuza për terrorizëm, pasi dyshohet se kishin hyrë të armatosur në territorin kuban me synimin për të destabilizuar qeverinë.