Sulmuesi i Atletico Madrid, Julian Alvarez, vazhdon të jetë në qendër të zërave të merkatos, pavarësisht se ka një kontratë afatgjatë në “Metropolitano” dhe ka deklaruar se është i lumtur në kryeqytetin spanjoll. Emra si Barcelona dhe Liverpool janë përmendur, por deri tani nuk ka pasur asgjë më shumë se disa “shikime admiruese”.
Këtë javë në kryeqytetin spanjoll është raportuar se Los Rojiblancos, të cilët janë shumë të kënaqur me yllin e tyre argjentinas, i kanë ofruar Alvarezit një kontratë të re, megjithëse ai është vetëm në sezonin e dytë në La Liga. 25-vjeçari ka edhe 4.5 vite të tjera në kontratën aktuale.
Historia u përhap se Alvarez e kishte refuzuar ofertën, por agjenti i tij, Fernando Hidalgo, doli për të sqaruar situatën dhe i tha “Calciomercato” (përmes “Sport”) se nuk ka asgjë të vërtetë në këtë.
“Asgjë nga ato që po shkruhen nuk është e vërtetë. Këto janë vetëm hipoteza imagjinare në këtë moment.”
Megjithatë, ishte vetë Hidalgo që ndezi spekulimet më herët këtë vit, kur komentoi për interesimin e supozuar nga Barcelona, duke theksuar se Alvarez ka një ndjenjë të veçantë për klubin katalanas.
“Ai ka marrë shumë telefonata, por qëndrimi i Atletico-s është se Julian do të qëndrojë edhe sezonin e ardhshëm. Ai admiron klubet spanjolle, dhe duke ndjekur karrierën e Leos që në fëmijëri, nuk mendoj se ka shumë argjentinas që nuk ndiejnë simpati për Barçën, sidomos duke parë paraqitjet e ekipit këtë sezon.”
Raportet nga kryeqyteti katalanas tregojnë se Barcelona e admiron shumë kampionin e botës, dhe në veçanti, presidenti Joan Laporta është impresionuar nga paraqitjet e tij.
Shkathtësia e Alvarezit dhe fakti që Barcelona po kërkon një zëvendësues afatgjatë për Robert Lewandowskin e bëjnë edhe më tërheqës.
Megjithatë, për shkak të kufizimeve të pagave të Barcelonës dhe dëshirës së Atleticos për ta mbajtur, kjo mbetet gjithashtu një “hipotezë imagjinare” për momentin.
Në kontrast me klauzolën “të përballueshme” të Antoine Griezmann prej 120 milionë eurosh, klauzola e Alvarezit është vendosur në 500 milionë euro./GazetaExpress/
