Akademia e Shkencave dhe Arteve të Kosovës, në krye me Mehmet Krajën, kanë lëshuar një komunikatë për media pas rezultateve të PISA’s. Sipas Akademisë së Shkencave dhe Arteve të Kosovës, rezultatet e PISA’s ishin dëshpërim për të gjihtë qytetarët e Kosovës, duke përjashtuar ata që do të duhej të mbanin përgjegjësi për këtë gjendje. Madje, Akademia premtoi se brenda gjashtë muajve do të hartohet një dokument gjithëpërfshirës për gjendjen në arsim, duke propozuar edhe masat përkatës për përmirësimin e gjendjes.

Në njoftim thuhet gjithashtu se kriza më e madhe e shoqërisë kosovare është kriza e arsimit.

Tutje në komunikatë thuhet se përgjegjës për gjendjen aktuale të arsimit në Kosovë janë në radhë të parë janë ata që kanë marrë përgjegjësitë politike dhe institucionale për ta qeverisur vendin.

Krejt në fund, Akademia e Shkencave dhe Arteve në Kosovë premtoi se brenda gjashtë muajve do të hartohet një dokument ku sqarohet gjendja e arsimit në Kosovë, gjithashtu duke propozuar masat përkatëse për përmirësimin e gjendjes.

Më poshtë gjeni komunikatën e plotë.

“Njoftim për opinion për rezultatet e PISA-s

Shpallja e djeshme e rezultateve të PISA-s (Program for International Student Assesment \ Program i Vlerësimit Ndërkombëtar i Nxënësve) ishte dëshpërim për të gjithë qytetarët e Kosovës, me përjashtim të atyre që do të duhej të mbanin përgjegjësinë objektive për këtë gjendje. Arsimi është njëri nga dështimet tona të mëdha, por moskokëçarja dhe reagimi i vakët institucional në këtë rast e bën situatën edhe më dëshpëruese, duke i dhënë asaj përmasat e një krize shoqërore, përfshirë edhe krizën morale. Kriza në arsim është kriza më e madhe e shoqërisë kosovare që në fillimet e perspektives së saj, sikundër që është zhgënjim dhe braktisje e pashembullt e idealizmit tonë historik, i mbështetur mbi idetë e iluminizmit dhe emancipimit.
Nxënia e dijeve nuk është dështimi i vetëm në arsim, ai është vetëm një segment i dukshëm dhe i afishuar në një mënyrë të tillë, që na bën të turpërohemi dhe të skuqemi të gjithë. Mungesat dhe dështimet tona janë shumë më të mëdha dhe kjo situatë na bën me dije se Kosova është e përfshirë prej shumë vitesh në një krizë të mësimit dhe të dijes, e cila si shtet dhe si komb na lë pa të ardhme. Testi i PISA-s nuk është dhe nuk mund të merret si komponentë artificiale e arsimit, siç pretendojnë institucionet tona. Ai është një indikator që tregon një gjendje dhe nuk është asnjëherë qëllim i vetvetes, që flet qartë se ka ardhur koha për të marrë përgjegjësi, ngase kjo krizë nuk amniston askënd. Vetëm se, një përgjegjësi kaq e gjerë nuk do të thotë se shoqëria jonë nuk i ka të identifikuar bartësit kryesorë të shkatërrimit në arsim dhe se ata nuk janë tashmë anonimë. Ata kanë adresë, ata i njohim të gjithë: në radhë të parë janë ata që kanë marrë përgjegjësitë politike dhe institucionale për ta qeverisur vendin.
Për të dalë nga kjo gjendje, qeverinë në ardhje e pret një punë e vështirë: të shpallë gjendjen emergjencë kombëtare dhe të marrë masat përkatëse, fillimisht duke i mënjanuar nga strukturat vendimmarrëse të gjithë ata që janë identifikuar si bartës proceseve negative dhe njëkohësisht duke krijuar mekanizma institucionalë për ta avancuar procesin arsimor. Është krejtësisht e qartë se ata që e kanë shkaktuar këtë krizë, nuk mund ta luajnë edhe rolin e shpëtimtarëve.
Akademia e Shkencave dhe e Arteve e Kosovës, në kuadër të përgjegjësive të veta dhe në bashkëpunim me të gjithë subjektet relevante e me njohës të kësaj fushe, brenda një periudhe 6 mujore do të hartojë një dokument gjithëpërfshirës për gjendjen në arsim, duke propozuar edhe masat përkatëse. Akademia do të jetë në dispozicion, për t’u bërë pjesë e rrugëdaljes nga kjo emergjencë kombëtare.

Për Akademinë e Shkencave dhe të Arteve të Kosovës,
Akademik Mehmet Kraja, kryetar”