Akuza të reja janë bërë publike ndaj Prince Andrew, lidhur me pretendime për masazhe private në Buckingham Palace, si dhe përdorimin e mundshëm të fondeve publike gjatë kohës kur shërbente si i dërguar tregtar i Mbretërisë së Bashkuar.

Masazhatoreja Monique Giannelloni ka deklaruar për mediat britanike se në qershor të vitit 2000 ishte ftuar në Pallat për t’i bërë masazh ish-Dukës së Jorkut. Sipas saj, ajo ishte prezantuar me Andrew nga Ghislaine Maxwell, e dënuar më vonë për trafikim seksual. Giannelloni pretendon se pagesa për shërbimin prej 75 paundësh ishte kryer nga një llogari e Familjes Mbretërore.

Në deklaratat e saj, ajo pohon se gjatë takimit Andrew kishte dalë nga banjoja pa rroba para fillimit të masazhit, duke e vendosur atë në një situatë të sikletshme. Pretendimet janë raportuar fillimisht nga MailOnline, ndërsa Pallati nuk ka dhënë koment zyrtar mbi këto akuza.

Ndërkohë, akuza të ngjashme janë bërë edhe nga terapistja tjetër, Emma Gruenbaum, e cila ka deklaruar më herët se ishte ndjerë në siklet gjatë seancave të masazhit në Royal Lodge. Ajo pretendon se ish-princi kishte bërë komente të papërshtatshme dhe kishte shfaqur sjellje të papërshtatshme gjatë takimeve.

Çështja rikthehet në vëmendje edhe për shkak të pretendimeve nga ish-nëpunës civilë, sipas të cilëve Andrew mund të ketë përdorur para të taksapaguesve për të mbuluar shpenzime masazhesh gjatë udhëtimeve zyrtare jashtë vendit. Një ish-zyrtar i ka thënë BBC se kishte kundërshtuar një kërkesë të tillë për rimbursim, por pagesa ishte miratuar më pas nga nivele më të larta.

Këto zhvillime vijnë në një kohë kur figura e Princit Andrew vazhdon të jetë nën hetime dhe nën presion publik për shkak të lidhjeve të tij të mëparshme me financierin e dënuar për abuzime seksuale Jeffrey Epstein.

Autoritetet britanike nuk kanë dhënë ende detaje të reja zyrtare mbi hetimet në vijim, ndërsa çështja vijon të tërheqë vëmendje të gjerë mediatike dhe politike në Mbretërinë e Bashkuar.