Gjykata Themelore në Prishtinë e ka dënuar me 1 mijë e 700 euro gjobë, Erdin Rekën për akuzën se i ka dhënë para me fajde këngëtarit Afrim Muçiqi në shumën totale prej 70 mijë euro. Vendimi i Gjykatës erdhi pasi i akuzuari kishte arritur marrëveshje me Prokurorinë Themelore në Prishtinë, për pranimin e fajësisë.

Sipas vendimit të 17 dhjetorit 2025, i akuzuari Reka u dënua me 600 euro gjobë dhe 3 muaj burgim, por me pëlqimin e të akuzuarit, dënimi me burgim iu zëvendësua në gjobë prej 1 mijë e 100 euro. Kështu, dënimi në total ndaj të akuzuarit është 1 mijë e 700 euro, raporton “Betimi për Drejtësi”.

Në vendim thuhet se më 12 dhjetor 2025, prokurori kishte dorëzuar në Gjykatë marrëveshjen për pranim fajësie të arritur mes Kryeprokurorit Zejnullah Gashi, prokurorit Armend Hamiti dhe të akuzuarit me mbrojtësin e tij, avokatin Flakron Sylejmani. Me atë marrëveshje, është rikualifikuar vepra penale nga “Fajdeja” në “Detyrim” nga neni 328, paragrafi 2 i Kodit Penal.

Sipas vendimit, në seancën fillestar të mbajtur më 12 dhjetor 2025, Reka ka deklaruar se e ndjen veten fajtor për veprën penale të detyrimit, për çka ka lidhur marrëveshje me Prokurorinë për pranim të fajësisë.

Më pas, sipas vendimit, Gjykata ka gjetur se bazuar në rrethanat që ndikojnë në llojin dhe lartësinë e dënimit, rezulton se i akuzuari ka shprehur keqardhje për veprimet e ndërmarra ndaj palës së dëmtuar dhe pranimin e fajësisë.

Ndërkaq, si rrethana rënduese, Gjykata ka gjetur se ndaj Rekës ka vendim të formës së prerë ku është i dënuar për mashtrim, për armëmbajtje pa leje, dhe për moslajmërim të veprave penale apo kryerësve të tyre.

Ndryshe, Prokuroria Themelore në Prishtinë, Departamenti për Krime të Rënda, më 31 korrik 2024 ka ngritur aktakuzë ndaj Erdin Rekës, i cili akuzohej se i ka dhënë para me fajde këngëtarit Afrim Muçiqi në shumën totale prej 70 mijë euro.

Sipas aktakuzës së siguruar nga “Betimi për Drejtësi”, Erdin Reka akuzohej se nga fundi i vitit 2012 deri nga gjysma e vitit 2013, i cili në atë kohë ishte shok i të dëmtuarit Afrim Muçiqi, duke shfrytëzuar në atë periudhë gjendjen e rëndë financiare të të dëmtuarit, fillimisht i jep para borxh me fajde, në disa raste, i cili borxh/fajde arrin shumën prej 70 mijë euro.

Në aktakuzë thuhet se duke shfrytëzuar edhe besimin e madh që i dëmtuari kishte ndaj të akuzuarit, ky i fundit përpiloi kontratë fiktive mbi huanë kinse e lidhur më 15 mars 2012 mes Rekës si huadhënës dhe në anën tjetër Afrim Muçiqi dhe djali i tij, A.M., si huamarrës.

Gjithnjë sipas aktakuzës, për shkak të vonesës për kthimin e borxhit/fajdesë në shumën e lartcekur, nga fillim i vitit 2013 në vazhdimësi, e ngarkon me kamatë mujore 30 %, kështu që i dëmtuari Afrim detyrohet që në vitin 2013 të shes shtëpinë për të paguar kamatën, e cila kamatë paguhet deri në fund të vitit 2014.

Kështu, aktakuza thotë se i akuzuari Reka ka realizuar dobi pasurore në shumën prej 512 mijë euro dhe kur i dëmtuari Afrim e kupton se është duke pësuar financiarisht dhe i akuzuari nuk ndalet së kërkuari fajde duke shpikur shuma të tjera, refuzon të paguajë shumën e mëtejshme të fajdesë ndaj Rekës.

Me këtë, Erdin Reka akuzohej se ka kryer veprën penale “Fajdeja” nga neni 331, paragrafi 3 të Kodit Penal.

Prokuroria kishte propozuar që pas administrimit të provave dhe përfundimit të shqyrtimit gjyqësor, i akuzuari të shpallet fajtor për veprën që i vihet në barrë dhe të dënohet sipas ligjit, si dhe të ngarkohet me shpenzimet e procedurës.