Mbrojtësi i Real Madrid, Trent Alexander-Arnold, ka shpërndarë lavde të mëdha për bashkëlojtarin e tij Federico Valverde, duke e cilësuar uruguaianin si futbollistin më të nënvlerësuar në planet.

Anglezi theksoi se e ka admiruar prej kohësh lojën e mesfushorit madrilen dhe se performancat e tij vazhdojnë ta impresionojnë.

“E kam lavdëruar edhe disa javë më parë, por përsëri më mungojnë fjalët për ta përshkruar. Ai është futbollisti më i nënvlerësuar në botë dhe ka qenë i tillë për vite me radhë. Edhe para se të vija këtu, gjithmonë e kam admiruar lojën e tij, sepse te ai nuk ka asnjë dobësi”, deklaroi Trent Alexander-Arnold.

Federico Valverde prej kohësh konsiderohet një nga lojtarët më të rëndësishëm të mesfushës së Real Madridit, falë energjisë së tij, aftësisë për të kontribuar në sulm dhe disiplinës taktike në fushë.