Trajneri i Milanit, Massimiliano Allegri thotë se Luka Modrici “sjell entuziazëm dhe pozitivitet” në skuadër, por e ardhmja e tij në “San Siro” mbetet e pasigurt: “Varet nga ai”.
Modrici, 40 vjeç, ka qenë titullar i rregullt i Milanit këtë sezon dhe kontrata e tij skadon në qershor.
Milani ka një opsion për ta zgjatur qëndrimin e tij deri në vitin 2027, por klubi nuk do ta aktivizojë atë nëse ylli kroat nuk pranon të qëndrojë.
Gjatë një konference për shtyp para ndeshjes të premten, Allegri u pyet nëse Modrici do të qëndrojë në “San Siro” edhe për një sezon tjetër.
“Klubi do të flasë me të. Varet nga ai,” tha Allegri.
“Ai ka një Kupë Bote për të luajtur… Ndërkohë, le ta lëmë të luajë dhe të kënaqet”, shtoi ai.
Gjashtë herë fitues i Ligës së Kampionëve me Real Madridin, Modrici ka shënuar dy gola dhe ka dhënë tre asistime në 31 paraqitje në të gjitha garat këtë sezon.
Ai iu bashkua “Rossonerëve” verën e kaluar, pasi përfundoi kontrata e tij me gjigantin e La Ligës.
“Luka erdhi dhe solli cilësi jo vetëm në aspektin teknik, por mbi të gjitha në atë njerëzor dhe profesional, sidomos për lojtarët e rinj,” vazhdoi Allegri.
“Të shohësh një lojtar, një njeri - Luka është 40 vjeç - me kaq pasion dhe dashuri për atë që bën, është e jashtëzakonshme. Kjo krijon entuziazëm dhe sjell pozitivitet në ambient”, tha Allegri.
Nesër, Milani pret Torinon në “San Siro” në javën e 30-të të Serie A.
“Rossonerët” ndodhen në vendin e dytë në tabelë, tetë pikë pas liderit, Interit./GazetaExpress/
