Analisti i referimit në “DAZN”, Luca Marelli, pretendon se goli i Christian Pulisic për Milanin kundër Sassuolos nuk duhej të ishte anuluar, por se mysafirët e meritonin një penallti për një faull të Strahinja Pavlović.
Barazimi 2-2 i Milanit në shtëpi ndaj Sassuolos e vuri gjyqtarin Valerio Crezzini në qendër të vëmendjes, teksa ai u përball me disa situata të ndërlikuara dhe vendimet e tij u kritikuan nga mediat italiane.
Reprezentuesit të SHBA-së, Pulisic, iu anulua një gol në pjesën e dytë, në momentin kur Milani po kryesonte 2-1.
Amerikani e dërgoi topin në rrjetë të zbrazët pasi Arijanet Muric devijoi me dorë një goditje me kokë të Pavlović nga afër.
Megjithatë, gjyqtari kishte sinjalizuar një shtyrje nga Ruben Loftus-Cheek në ndërtimin e aksionit, pikërisht pas Pavlović.
“Është një vlerësim në fushë, sepse ka pasur kontakt. Loftus-Cheek vendos duart, por unë nuk shoh ndonjë shtyrje,” tha analisti i referimit i “DAZN”, Luca Marelli (për “Calciomercato.com”).
“Crezzini mezi e fishkëlleu. Ky kontakt është nën prag; nuk ka një shtyrje të vërtetë. Ky gol nuk duhej të ishte anuluar”, shtoi ai.
Marelli vuri re edhe një tjetër gabim të arbitrit të ndeshjes Milan – Sassuolo, duke pretenduar se mysafirët duhej të kishin përfituar një penallti për një faull të Pavlović në minutat e fundit, kur rezultati ishte 2-2.
“Pavlovic nuk e preku topin, por me këmbën e djathtë goditi këmbën e majtë të Cheddiras. VAR-i ishte shumë i nxituar. Ishte penallti dhe VAR duhej të kishte ndërhyrë,” tha Marelli.
Milani mbetet kryesues i Serie A me 32 pikë, por mund të kalohet nga Napoli nëse Partenopeit fitojnë sot në transfertë ndaj Udineses./GazetaExpress/
