Vijimi i raportimeve për veprime proruse të ministrit të jashtëm hungarez Péter Szijjártó nuk ka befasuar askënd në Bashkimin Evropian, deklaron analisti i politikës së jashtme nga Zagrebi, Zheljko Trkanjec. Kjo vjen në kohën kur BE ka filluar të kufizojë ndarjen e informacioneve të ndjeshme me Hungarinë, pas paralajmërimeve të kryeministrit polak Donald Tusk për rrjedhje të mundshme drejt Rusisë.

Sipas raportimeve të mediave ndërkombëtare, qeveria hungareze ka mbajtur kontakte të afërta me Moskën gjatë luftës në Ukrainë, ndërsa Szijjártó dyshohet se ka informuar homologun rus Sergey Lavrov për diskutimet brenda BE-së.

Analistët theksojnë se kjo nuk është një iniciativë individuale, por pjesë e strategjisë së kryeministrit hungarez Viktor Orbán, i cili synon të ruajë marrëdhënie të favorshme me Moskën për përfitime ekonomike, veçanërisht në sektorin e energjisë.

Por dimensioni më shqetësues, sipas Trkanjec, lidhet me Ballkanin Perëndimor. Ai vlerëson se Orbán mund të përdorë presidentin serb Aleksandar Vuciq dhe liderin e serbëve të Bosnjës Milorad Dodik si pjesë e një strategjie më të gjerë destabilizuese në rajon.

Sipas këtij skenari, Vuciq, përmes ndikimit të tij mbi Dodik, mund të ndihmojë në rritjen e tensioneve në Bosnje dhe Hercegovinë, duke krijuar një klimë pasigurie që do t’i hapte rrugë ndërhyrjeve politike dhe gjeostrategjike. Në këtë “triumvirat”, Orbán do të paraqitej si aktor stabilizues, duke kërkuar njëkohësisht të rrisë ndikimin hungarez dhe të avancojë interesat e tij territoriale dhe ekonomike.

Trkanjec paralajmëron se nëse situata përshkallëzohet dhe hapet çështja e ndryshimit të kufijve, Hungaria mund të tentojë të përfshihet drejtpërdrejt në këto procese, me synimin afatgjatë për dalje në det dhe forcim të rolit të saj në rajon. /Radiosarajevo