Me vetëm 70 ditë para fillimit të Botërorit 2026 në SHBA, Meksikë dhe Kanada, kombëtarja e Brazilit është në qendër të vëmendjes, pasi trajneri Carlo Ancelotti thuhet se ka vendosur të mos përfshijë Neymar Jr. në listën përfundimtare.
Sipas raportimeve të “ESPN”, tekniku italian ka pothuajse të finalizuar listën prej 26 lojtarësh për “Seleção”, dhe emri i numrit 10 nuk figuron në të.
Vendimi vjen pasi Neymar ishte lënë jashtë edhe në miqësoret ndaj Francës dhe Kroacisë, për shkak të rikuperimit nga një dëmtim muskulor.
Ancelotti dhe Federata Braziliane e Futbollit (CBF) kanë qenë të qartë: për t’u rikthyer në kombëtare, Neymar duhet të jetë “100%” fizikisht. Megjithatë, gjithçka tregon se lojtari i Santosit nuk do të udhëtojë drejt Amerikës së Veriut.
Nga 26 lojtarët e planifikuar, 24 vende thuhet se janë tashmë të sigurta, dhe 34-vjeçari nuk është pjesë e tyre.
Në këtë skenar, tre lojtarë po luftojnë për dy vende: Lucas Paquetá, Endrick dhe Igor Thiago.
Strategjia e Ancelottit duket e qartë: fokus te të rinjtë dhe ndërtimi i një ekipi më kolektiv, pa u varur nga një yll i vetëm.
Përveç dëmtimeve, një faktor i rëndësishëm është edhe mungesa e ritmit të ndeshjeve – Neymar nuk ka luajtur për Brazilin që nga tetori i vitit 2023 dhe këtë vit ka zhvilluar vetëm pesë ndeshje me Santosin.
Megjithatë, mungesa e tij ka shkaktuar reagime të mëdha. Figura si Jose Mourinho, Romario, Ronaldo Nazario dhe Cafu kanë shprehur habi, ndërsa edhe Rodrygo Goes dhe Vinicius Junior kanë mbështetur përfshirjen e tij.
Nëse ky vendim konfirmohet, mund të shënojë fundin e një epoke për Brazilin, me Neymar që për më shumë se një dekadë ka qenë figura kryesore dhe lideri i skuadrës.
Projekti i ri duket se synon një ekip më të balancuar dhe fleksibël, ku rëndësi ka kolektivi dhe jo individi.
Lista përfundimtare e Brazilit pritet të publikohet më 18 maj./GazetaExpress/
