Rikthimi i Ansu Fatit në Ligue 1 është shndërruar në një nga befasitë më të mëdha të futbollit evropian.
Sulmuesi spanjoll, i huazuar nga Barcelona tek AS Monaco, jo vetëm që ka rigjetur instinktin e golit, por gjithashtu ka thyer një rekord që kishte qëndruar për 77 vjet në kampionatin francez.
Me vetëm 126 minuta në fushë, ai u bë lojtari më i shpejtë që arrin në pesë gola në Ligue 1 që nga viti 1948, duke tejkaluar shifrën e mëparshme të Johan Audel (137 minuta me Valenciennes).
Kjo statistikë tregon efikasitetin e jashtëzakonshëm të Fatit dhe konfirmon se, në moshën vetëm 22-vjeçare, ai është rikthyer mes elitës.
Ish-lojtari i Barcelonës, që iu bashkua Monacos pasi rinovoi kontratën me klubin katalanas deri në vitin 2028, po kalon një formë të shkëlqyer.
Në vetëm tre ndeshje kampionati, ai ka shënuar pesë gola - plus një tjetër në Ligën e Kampionëve - duke pasur një mesatare prej 1.67 golash për ndeshje dhe duke ndarë vendin e parë në listën e golashënuesve me Joaquín Panichelli të Strasbourgut.
Performanca e tij më e fundit ishte vendimtare në barazimin e Monacos 2-2 ndaj Nicës në derbin e Côte d’Azur, ku shënoi dy gola nga penalltia për të siguruar një pikë të vlefshme.
Edhe pse skuadra e Adi Hütter nuk arriti përmbysjen, Ansu Fati shkëlqeu sërish, duke u treguar si pikë referimi në sulm, e cila i kishte munguar ekipit.
“Ai është në një moment të madh besimi. Është një lojtar që bën diferencën sa herë që prek topin,” deklaroi trajneri pas ndeshjes në “Stade Louis II”.
Pas viteve të vështira me lëndime, Ansu Fati po përjeton një rilindje të vërtetë futbollistike.
Që nga shpërthimi i tij te Barcelona në vitin 2019, kur debutoi vetëm 16 vjeç nën drejtimin e Ernesto Valverde, sulmuesi kishte hasur vështirësi për të rikthyer ritmin dhe vetëbesimin.
Koha në Ligue 1 po i rikthen të dyja. Reprezentuesi i Spanjës duket se ka gjetur versionin e tij më të mirë, duke kombinuar shpejtësi, fantazi dhe saktësi para portës.
Performancat e tij kanë qenë aq të fuqishme sa shtypi francez tashmë e përshkruan si “xhevahirin e rilindur të futbollit evropian.”
Nëse ruan këtë nivel, Ansu Fati jo vetëm që do të ketë thyer një rekord historik, por gjithashtu do të ketë shuar çdo dyshim që dikur rrethonte rikthimin e tij në majat e futbollit.
Futbolli, duket, po i buzëqesh sërish./GazetaExpress/
