Ish-kampioni i botës në peshat e rënda, Anthony Joshua, e nokautoi YouTuberin e kthyer në boksier, Jake Paulin në duelin e tyre kontrovers të mbështetur nga “Netflix”, të zhvilluar në Miami.

Joshua, dy herë kampion bote, e pati më të vështirë sesa pritej për ta mposhtur kundërshtarin me shumë më pak përvojë të premten mbrëma, por në fazat e vona të ndeshjes prej tetë raundesh arriti ta shfrytëzojë madhësinë dhe fuqinë e tij superiore.

Një përballje mesatare në “Kaseya Center” – ku raportohet se të dy boksierët ndanë një shpërblim gjigant prej 184 milionë dollarësh – herë pas here u shndërrua në farsë, me Paulin që binte vazhdimisht në dysheme dhe kapte këmbët e Joshuas.

Në një moment, edhe gjyqtari Christopher Young dukej se po humbiste durimin, duke i paralajmëruar boksierët në raundin e katërt: “Tifozët nuk kanë paguar për ta parë këtë”.

Teksa Pauli lodhej, Joshua nisi të godiste më shpesh dhe pasi e rrëzoi amerikanin dy herë në raundin e pestë, fundi erdhi shpejt në të gjashtin.

Joshua e shtyu 28-vjeçarin në qoshe dhe, pasi e përgatiti me një të majtë të fortë, dha goditjen përfundimtare me të djathtën në mjekër, duke e rrëzuar Paulin në tapet.

“Nuk ishte paraqitja më e mirë,” pranoi Joshua, 36 vjeç, pas ndeshjes.

“Por qëllimi ishte ta kapja Jake Paulin, ta mbaja nën presion dhe ta dëmtoja. Kjo ishte kërkesa para ndeshjes dhe e kisha në mendje. Mori pak më shumë kohë sesa pritej, por e djathta më në fund gjeti destinacionin e saj”, shtoi ai.

Joshua gjithashtu e lavdëroi Paulin për faktin që rezistoi deri në raundet e vona.

“Dua t’ia jap meritat – ai u ngrit herë pas here,” tha Joshua.

“Ishte e vështirë për të aty brenda, por vazhdoi të kërkonte një mënyrë. Duhet të jesh burrë i vërtetë për ta bërë këtë”, vazhdoi ai.

Pauli, me gojën e përgjakur nga sulmi final i Joshuas, tha se besonte se i ishte thyer nofulla, por u shpreh i kënaqur me paraqitjen e tij.

“Ishte argëtuese. Dhashë gjithçka,” tha Paul.

“U kënaqa shumë. Mendoj se nofulla më është thyer, nga mënyra si ndihem. Por Anthony është një nga më të mirët që e kanë bërë ndonjëherë këtë, kështu që… do të rikthehem dhe do të fitoj një titull bote. Të jem i sinqertë, thjesht u lodha – ishte shumë e vështirë të përballoja peshën e tij. Mendoj se me kondicion më të mirë fizik, do të kisha mundur të vazhdoja dhe të luftoja më gjatë. Por ai godet shumë fort”, tha Pauli.

Ndeshja u transmetua drejtpërdrejt në “Netflix” për rreth 300 milionë abonentë.

Ky duel i krijuar posaçërisht për transmetim, që u zhvillua pak më shumë se një vit pasi Paul kishte luftuar me 58-vjeçarin Mike Tyson në një tjetër përballje të kritikuar në “Netflix”, kishte shkaktuar shqetësim në botën e boksit për shkak të dallimit të madh në madhësi dhe përvojë mes dy boksierëve.

Megjithatë, nokauti shkatërrues në raundin e parë ose të dytë nga Joshua, që shumica e kishin parashikuar, nuk ndodhi, pasi Pauli u përpoq me dëshpërim të qëndronte jashtë distancës së kampionit olimpik të vitit 2012.

Joshua, që po luftonte për herë të parë pas 15 muajsh, dukej gjithmonë boksieri më i rrezikshëm, duke goditur 48 nga 146 goditje të hedhura, krahasuar me vetëm 16 goditje të sakta nga Pauli./GazetaExpress/