Antoine Semenyo i Bournemouthit është gati të bëjë “hapin tjetër” në karrierën e tij me një largim nga skuadra e Premierligës, sipas trajnerit të Ganës, Otto Addo.

Semenyo ka bërë një start të shkëlqyer këtë sezon me skuadrën e Andoni Iraolas dhe ka tërhequr interesin e shumë klubeve të mëdha.

Manchester United, Liverpool, Arsenal, Manchester City dhe Tottenham janë të gjitha të lidhura me një lëvizje për 25-vjeçarin, i cili ka një klauzolë lirimi prej 74 milionë eurosh (£65m) në kontratën e tij me Bournemouth që do të aktivizohet në janar.

Addo thotë se Semenyo e ka merituar mundësinë për një transferim të madh – dhe se do të ishte “natyrale” për të, të ndërmerrte këtë hap.

Duke folur për “The Athletic”, ai tha: “Ai ka bërë shumë mirë te Bournemouth, por me gjithë respektin për Bournemouth dhe atë që po bëjnë, sigurisht që është natyrale që ai të bëjë hapin tjetër”.

Trajneri i Ganës minimizoi idenë se një lëvizje e mundshme mund të ndikojë te forma e Semenyos në Botërorin 2026, ku ai do të përballet me Anglinë, Kroacinë dhe Panamanë.

“Nëse është në dimër apo në verë, kjo është pyetje tjetër, por për ne nuk do të bëjë diferencë. Jam duke pritur të tregojë edhe më shumë nga ajo që di t’i ofrojë botës,” tha Addo.

Vlera e Vlerësimit të Transferimit (ETV) për Semenyo është rritur vazhdimisht gjatë karrierës së tij, me anësorin që ka tejkaluar pritshmëritë falë zhvillimit të tij të vazhdueshëm.

Bournemouth e bleu atë për vetëm 10.3 milionë euro nga Bristol City në vitin 2022, kur ETV-ja e tij ishte 4.2 milionë euro, por klubi mund të presë përfitim të madh kur ai të shitet. ETV-ja e tij tani është 51.3 milionë euro – një vlerë rekord në karrierën e tij.

Kjo rritje është nxitur nga paraqitjet e tij të jashtëzakonshme në fushë. Semenyo ka qenë gjithashtu një nga anësorët më të mirë në Premierligë këtë sezon, duke spikatur veçanërisht me driblimet e tij.

Sipas ekspertëve të të dhënave “SciSports”, vetëm Jeremy Doku i Manchester City ka qenë më i mirë se ai në këtë aspekt, ndërsa në performancën e përgjithshme ai renditet i katërti mes lojtarëve të pozicionit të tij.

Interesi i madh i klubeve kryesore për nënshkrimin e Semenyos është, pra, i kuptueshëm – dhe Bournemouth nuk do të ketë mundësi ta ndalojë largimin e tij nëse ndonjë nga gjigantët e Premierligës paguan klauzolën e tij të lirimit./GazetaExpress/