Shefja e zyrës së BE-së në Kosovë, Nataliya Apostolova, ka folur për takimin e mbrëmshëm me kryetarin e LV-së, Albin Kurti, dhe kreun e LDK-së, Isa Mustafa.
Apostolova ka theksuar se nuk u takon atyre që të ndërhyjnë në procesin e formimit të qeverisë në vend.
“Kemi dëgjuar palët nuk kemi avokuar për një zgjidhje të veçantë në takimin e mbrëmshëm me partitë që po negociojnë arritjen e koalicionit. Nuk na takon neve të ndërhyjmë”, ka deklaruar ajo, duke shtuar se është e rëndësishme që sa më shpejt të formohet qeveria e re.
Këto komente Apostolova i bëri në takimin me ambasadoren e Kroacisë në Kosovë, Danijela Barishiq, ku paraqitën sot prioritetet e Presidencës së Kroacisë të Këshillit të Bashkimit Evropian.
Dje ndërkaq me ftesë të LV-së janë ftuar në takimin Kurti – Mustafa edhe ambasadorët e QUINT-it.
Aty është paraqitur ambasadori i Britanisë së Madhe, Nicholas Abott, ai gjerman Christian Heldt, si dhe ambasadori italian, Nicola Orlando. Ambasadori i ShBA-së, Philip Kosnett, nuk ka marrë pjesë, por e ka dërguar Jessica Long, e cila është këshilltare ekonomike dhe politike në Ambasadë. Edhe Franca është përfaqësuar me zëvendësambasadorin. /Express/
