Real Madridi ka marrë një lajm shumë pozitiv për gjendjen fizike të Kylian Mbappés, sipas një përditësimi të fundit nga trajneri Álvaro Arbeloa.
Sulmuesi francez mund të rikthehet në kohë për ndeshjen e kthimit kundër Manchester Cityt në 1/8 e finales së Ligës së Kampionëve, ku madrilenët kryesojnë 3-0.
Mbappé ka munguar në katër ndeshjet e fundit të Real Madridit për shkak të një problemi në gju që e ka shqetësuar që nga dhjetori.
Ka pasur shumë fshehtësi rreth rikthimit të tij, madje ai udhëtoi edhe në Paris për një opinion të dytë mjekësor. Megjithatë, rikthimi duket gjithnjë e më pranë.
Arbeloa tha: “Po përmirësohet çdo ditë dhe rikuperimi po shkon sipas planit. Kemi bërë një plan dhe gjithçka varet nga progresi i tij, por unë e shoh shumë mirë. Nuk do të jetë i gatshëm për nesër, por jam i bindur se do të udhëtojë për në Manchester”.
Mbappé do të mungojë në ndeshjen ndaj Elches, ndërsa Arbeloa nuk konfirmoi nëse ai mund të luajë në derbin e Madridit fundjavën e ardhshme apo me kombëtaren e Francës gjatë pauzës së kombëtareve.
Arbeloa foli edhe për talentin e ri Manuel Ángel, i cili ka pasur ndikim pozitiv kundër City.
“Madhësia e tij është madhësia e zemrës së tij. Kam luajtur me lojtarë të mrekullueshëm, kampionë Evrope dhe bote që nuk ishin as 1.70 m, dhe ishin fantastikë. Futbolli sot është ndryshe, por ai nuk do të ketë problem të bëhet një lojtar elitë”, tha ai.
Ai shtoi se lojtari është i gjithanshëm dhe mund të luajë në të dy krahët, duke theksuar se beson shumë tek ai.
Megjithatë, pas fitores ndaj Cityt, Real Madridi duhet të përqendrohet shpejt te ndeshja e radhës në La Liga kundër Elches.
Arbeloa paralajmëroi se ekipi duhet të ruajë mentalitetin fitues për të mos i dhënë avantazh në garën për titull Barcelonës./GazetaExpress/
