Real Madrid vazhdoi formën e mirë në La Liga duke mposhtur 4-1 Real Sociedad në “Santiago Bernabéu”, në një ndeshje ku munguan disa nga yjet kryesorë si Kylian Mbappé dhe Jude Bellingham.
Protagonist absolut ishte Vinícius Júnior me dy gola, ndërsa realizuan edhe Federico Valverde dhe Gonzalo García.
Pas ndeshjes, trajneri Álvaro Arbeloa vlerësoi paraqitjen e skuadrës dhe shpjegoi përdorimin e skemës 4-4-2, duke theksuar kompaktësinë në mbrojtje dhe rrezikshmërinë në kundërsulm.
“Po shoh një Vinicius të madh prej një muaji. Ai është lojtar që shkon përtej shifrave dhe mund të ndryshojë ndeshjen në çdo moment,” deklaroi Arbeloa.
Ai konfirmoi se Mbappé u kursye për sfidën e së martës në Ligën e Kampionëve ndaj Benfica, duke shtuar se francezi pritet të jetë i gatshëm.
Tekniku madrilen pati fjalë të mira edhe për Trent Alexander-Arnold, i cili asistoi në golin e parë, si dhe për rikthimin e Dani Carvajal pas lëndimit.
Në fund, Arbeloa theksoi se kjo fitore i jep besim ekipit para përballjes vendimtare në Champions, duke e cilësuar atë si një nga “katër finalet” në 11 ditë për Los Blancos. /GazetaExpress
