Trajneri i Real Madridit, Álvaro Arbeloa, ka deklaruar se asnjë lojtar në skuadrën e tij nuk gëzon trajtim të veçantë.
Kjo bie ndesh me narrativën që ka shoqëruar klubin madrilen gjatë këtij sezoni, ndërsa ai shtoi se nuk është në pozitë për t’i dhënë këshilla homologut të tij, Pep Guardiola.
Një nga temat e këtij sezoni te Real Madridi ka qenë perceptimi se lojtarët yje marrin trajtim të veçantë në “Bernabéu”, si dhe pakënaqësia në rritje e tifozëve për fuqinë që besohet se kanë lojtarët brenda klubit. Megjithatë, Arbeloa e mohoi këtë.
“Ajo që po bëjnë të gjithë të rinjtë nga akademia është të performojnë në një nivel shumë të lartë; po luajnë shumë mirë, gjë që ata dinë ta bëjnë. Janë djem shumë të talentuar që po kontribuojnë shumë. Kur disa lojtarë të rikuperohen, do të kem më shumë opsione dhe shpresoj që gjithmonë të mund të zgjedhim njëmbëdhjetëshin më të përshtatshëm,” tha ai.
Tre ndeshjet e fundit kanë treguar edhe një version më ofensiv të Federico Valverde, i cili i ka dhënë skuadrës pesë gola.
Megjithatë, Arbeloa dëshiron që ai të vazhdojë me të njëjtin ritëm edhe kur skuadra të ketë më shumë opsione në sulm.
“Fede mund të luajë në çdo pozicion dhe e bën shumë mirë kudo. Është në formën e tij më të mirë dhe po shënon gola. Ka liri lëvizjeje. Kur Jude Bellingham dhe Kylian Mbappé të rikthehen, duhet të vazhdojmë me këtë version të Fedes”, shtoi ai.
Ndërkohë, ka ngritur shumë pikëpyetje fakti që Arda Güler ishte ndër lojtarët e parë që u zëvendësua kundër Manchester Cityt dhe më pas qëndroi në stol kundër Elches.
Megjithatë, ai hyri në lojë dhe shënoi një nga golat më të bukur të sezonit nga gjysma e fushës.
“Goli kundër Elches ishte spektakolar. Një gol fantastik. Sa i përket duelimit me Erling Haaland në goditjet nga këndi, duhet të mbrojmë norvegjezin dhe sa më shumë lojtarë aq më mirë. Por mendoj se Arda bëri një punë të mirë dhe shpresojmë ta përsërisim këtë edhe nesër”, tha Arbeloa.
Ai u pyet gjithashtu për vendimin e Guardiolës për t’u dhënë lojtarëve një ditë pushim para përballjes me madrilenët.
“Mendoj se ai e shpjegoi mirë këtë mëngjes. Nuk është diçka e re për ta. Është ndeshja e 987-të që Guardiola drejton si trajner. Nuk jam në pozitë për t’i dhënë këshilla. Është një ekip që e njeh shumë mirë njëri-tjetrin; luajnë pothuajse me sy mbyllur sepse kanë qenë bashkë për shumë vite”, u shpreh ai.
Arbeloa do të ketë më shumë opsione në sulm të martën në mbrëmje, pasi Mbappé është shpallur i gatshëm për të udhëtuar me ekipin.
Ai pritet të ketë një rol në ndeshjen në “Etihad”, ndërsa Real Madridi do të përpiqet të ruajë avantazhin prej tre golash./GazetaExpress/
