Torino raportohet se ka arritur marrëveshje për dy lojtarë të Empolit pas rënies së tyre nga Serie A, duke siguruar Ardian Ismajlin me parametër zero dhe Tino Anjorin.
Sipas Sky Sport Italia, është arritur marrëveshje si me klubin ashtu edhe me mesfushorin ofensiv Anjorin për të finalizuar transferimin. 23-vjeçari, ish-reprezentues i Anglisë U-20, ishte lidhur me disa skuadra pas rënies së Empolit, përfshirë Fiorentinën, Bolognën dhe Romën.
Megjithatë, ai duket se do të transferohet te Torino, ku shihet si zëvendësuesi i Samuele Riccit që pritet të kalojë te Milani. Empoli do të duhet t’i japë gjysmën e shumës së transferimit ish-klubit të lojtarit, Chelseat, si pjesë e marrëveshjes së transferimit falas që u realizua në vitin 2024.
Anjorin pati shumë probleme me lëndimet këtë sezon dhe zhvilloi vetëm 22 paraqitje në Serie A, duke kontribuar me 2 gola dhe 3 asistime.
Ndërkohë, Torino kishte arritur prej kohësh marrëveshje personale me Ardian Ismajlin, i cili është lojtar i lirë pasi kontrata e tij me Empolin përfundoi. Klubi torinez e kishte mbajtur në pritje deri në largimin e Saul Coco, por ky i fundit po has vështirësi në arritjen e marrëveshjes me klubin Al-Duhail, duke zvarritur procesin.
