Arsenal dhe Manchester City kanë bërë histori që para se të nisë finalja e Carabao Cup të dielën në “Wembley”.
Arsenali dhe City kaluan respektivisht Chelsean dhe Newcastle Unitedin në gjysmëfinale dhe tani përballen në finalen e parë të sezonit në Angli.
Rivaliteti mes dy skuadrave është rritur shumë vitet e fundit, me përballje të nxehta edhe në kampionat.
Arsenali e mposhti Cityn në FA Community Shield të vitit 2023 me penallti, ndërsa finalja e fundit e Kupës së Ligës mes tyre ishte në vitin 2018, kur skuadra e Pep Guardiola fitoi ndaj “Topçinjve” në finalen e fundit të Arsene Wenger me klubin.
Por kjo ndeshje tashmë ka hyrë në histori: është hera e parë që skuadra në vendin e parë në Premierligë përballet me skuadrën në vendin e dytë në finalen e Kupës së Ligës.
Që nga themelimi i këtij kompeticioni në vitin 1961, ka pasur shumë finale të mëdha, por kurrë më parë nuk janë përballur dy ekipet më të mira të kampionatit anglez.
City e ka fituar këtë kupë tetë herë, katër prej tyre nën drejtimin e Guardiolës, i cili trofeun e parë e fitoi pikërisht kundër Arsenalit tetë vite më parë.
Nga ana tjetër, Arsenali ka fituar FA Cup 14 herë (rekord), por ka vetëm dy trofe të Kupës së Ligës dhe është skuadra që ka humbur më së shumti finale në këtë kompeticion.
Të dy klubet kanë marrë nga 32,000 bileta për finalen, por kjo ndeshje do të jetë e para që zhvillohet pas hyrjes në fuqi të një ligji të ri që ndalon “tailgating” – hyrjen në stadium pa biletë duke kaluar pas dikujt tjetër.
Ky veprim tani është i paligjshëm dhe shkelësit rrezikojnë arrestim, ndalim prej pesë vitesh dhe gjobë deri në 1,000 paund.
Ky vendim erdhi pas kaosit në finalen e EURO 2020 në “Wembley”, ku mijëra tifozë anglezë hynë në stadium pa bileta.
Ministrja për Policinë dhe Krimin, Sarah Jones, deklaroi:
“Tifozët duhet të jenë në gjendje të shijojnë ndeshjen pa u ndjerë të pasigurt apo të kërcënuar. Po i japim policisë mjetet e nevojshme që kaosi që pamë në Wembley para pesë vitesh të mos ndodhë më. Kushdo që rrezikon të tjerët duke hyrë me forcë në stadium do të përballet me pasoja serioze”./GazetaExpress/
