Arne Slot ka zbuluar se pronarët e Liverpoolit, Fenway Sports Group, e kanë shlyer të plotë kontratën e Diogo Jotës në favor të familjes së tij, pas vdekjes tragjike të yllit portugez në fillim të korrikut.

Sulmuesi humbi jetën në një aksident automobilistik, së bashku me vëllanë e tij, Andre Silva, ndërsa udhëtonin përmes Spanjës për të kapur tragetin drejt Mbretërisë së Bashkuar për përgatitjet e para-sezonit.

Jota kishte ende dy vite kontratë me Liverpoolin në momentin kur ndërroi jetë, me raportimet në mediat portugeze gjatë verës që sugjeronin se klubi do ta nderonte marrëveshjen e tij të plotë.

Slot tani e ka konfirmuar këtë gjest bujar, duke zbuluar se FSG e shlyeu të gjithë kontratën për të ndihmuar të afërmit e lojtarit.

“Fatkeqësisht na u desh të sillnim një lojtar më shumë nga sa kishim planifikuar,” tha ai për Ally McCoist në një intervistë për TNT Sports.

“Prandaj shpenzimet tona ishin më të larta sesa ishte menduar. Dhimbja e qytetit… kjo është ajo që e bën për mua të veçantë të punoj në këtë klub. Të punosh në një klub ku ka sukses dhe parada, sigurisht që parada është më e madhe se kudo tjetër në botë. Por mënyra si u sollën tifozët pas asaj tragjedie… sa shumë lule, sa shumë memoriale. Më bëhet gati të emocionohem vetëm duke menduar. Është e pabesueshme ajo që kanë bërë tifozët tanë.

Edhe lojtarët, mënyra si u sollën gjatë dhe përreth funeralit. Pastaj duhej të stërviteshim përsëri. Dhe ka momente kur mendoj: ‘Çfarë duhet të ndjejë gruaja dhe fëmijët e tij tani?’.
Sepse tingëllon aq e vështirë… jeta jonë vazhdon. Njerëzit presin që unë t’i përgatis gjithmonë. Dhe ndonjëherë ndjehet e vështirë, duke e ditur sa e rëndë është për familjen dhe për prindërit. Faza në të cilën ndodhen tani dhe që do t’i shoqërojë gjithë jetën e tyre.

Thashë se sa krenar ndihesha për reagimin e tifozëve, por edhe pronarët… Pronarët zakonisht kritikohen, ashtu si trajnerët, por mënyra si u sollën në këtë situatë, duke i paguar gruas dhe fëmijëve të tij të gjithë paratë e kontratës [është e lavdërueshme]. Ndoshta disa mendojnë se është normale, por në futboll nuk është.”

Kryetari i Liverpoolit, Tom Werner, foli gjithashtu për mënyrën se si klubi ka mbështetur gruan e Jotës, Rute Cardoso, gjatë një interviste në The Overlap US këtë muaj.

“Ai ishte një person i jashtëzakonshëm,” tha ai. “Ishte i dashur, jo sepse ishte golashënuesi kryesor, por sepse ishte vërtet i mirë. Ishte tepër kurioz. Bisedonim shpesh për lojërat elektronike. Kur bënte festimin e golit, i referohej atyre. Kishte një skuadër esports dhe, sipas reputacionit, ishte një nga lojtarët më të mirë të FIFA-s në Premier League. Këtë e përmend sepse kishte një kureshtje që tërhiqte njerëzit drejt tij. Ishte shumë popullor mes bashkëlojtarëve dhe në dhomën e zhveshjes.

Një gjë që admiroja tek ai ishte se, edhe kur pati disa dëmtime të rënda vitin e kaluar, nuk u ankua, por u fokusua te si mund ta ndihmonte klubin dhe e dinte që mund të bënte ndikim edhe nëse nuk luante titullar. Dhe e bëri, sepse shënoi disa gola vendimtarë. E pranoi rolin e tij me dinjitet.
Është gjithmonë tragjedi kur dikush ndahet nga jeta para kohe. Por vdekja e tij i preku të gjithë, sepse ai ishte shumë i dashur.

Ishte menjëherë e rëndësishme për ne të kontaktonim me gruan e tij dhe të siguronim që ajo të kuptonte se jemi si familje. Është një klishe, por ne e shohim veten si familje dhe donim të siguronim që ajo dhe fëmijët e saj të ishin mirë financiarisht. Është shumë e rëndësishme për ne ta tregojmë këtë, që pavarësisht se çfarë ndodh, kujdesemi për futbollistin, por akoma më shumë për njeriun.”

Humbja shkatërruese e Jotës shkaktoi një valë të madhe pikëllimi dhe dhimbjeje në botën e futbollit, me Liverpoolin që e nderoi sulmuesin me shumë homazhe prekëse pas ndarjes së tij tragjike nga jeta.

Klubi nga Merseyside e ka tërhequr përgjithmonë fanellën me numrin 20 si kujtim i përhershëm.

Një skulpturë në “Anfield”, e krijuar nga sende të ricikluara nga homazhet e tifozëve, është porositur gjithashtu.

Për më tepër, një emblemë “Forever 20” do të qepet në fanellat dhe xhupat e ngrohjes së lojtarëve, ndërsa një program i ri futbolli për bazat do të nisë në emër të Jotës.

Liverpooli gjithashtu nderoi Jotën dhe Silvën gjatë përgatitjeve para-sezonale me momente prekëse para çdo ndeshjeje, përfshirë homazhe me lule dhe minuta heshtjeje.

Tifozët vazhdojnë ta kujtojnë lojtarin portugez duke kënduar këngën e tij të njohur në minutën e 20-të të çdo ndeshjeje./GazetaExpress/