Sezoni i vështirë i Liverpoolit arriti një tjetër pikë të ulët të shtunën, pasi u eliminua nga Manchester City në FA Cup.
Humbja 4-0 në “Etihad Stadium” ka rritur presionin mbi trajnerin Arne Slot, i cili pa skuadrën e tij të shembet pas një fillimi premtues në çerekfinale.
Kjo humbje nuk ishte vetëm një goditje për shpresat për trofe, por edhe një konfirmim se ky është një nga sezonet më të dobëta të klubit në kohët moderne.
“The Reds” kanë humbur tashmë 15 ndeshje në të gjitha garat, shifra më e lartë që nga sezoni 2014/15 nën drejtimin e Brendan Rodgers, kur skuadra pësoi 18 humbje dhe mbeti jashtë top katërshes.
Statistikat janë shqetësuese për tifozët, sidomos duke parë kontrastin me sukseset e vazhdueshme gjatë epokës së Jürgen Klopp.
Erling Haaland ishte protagonisti kryesor edhe një herë, duke realizuar një “hattrick” dhe duke u bërë lojtari i parë që shënon pesë gola kundër Liverpoolit në një sezon që nga Matt Le Tissier me Southampton në sezonin 1993/94.
Antoine Semenyo gjithashtu gjeti rrjetën, ndërsa penalltia e humbur nga Mohamed Salah e bëri edhe më të hidhur këtë pasdite për mysafirët.
Pavarësisht rezultatit të thellë, Slot u përpoq të gjejë anët pozitive në fillimin e ndeshjes, para se të pranonte problemet e njohura të skuadrës.
Duke folur për “BBC Sport” pas ndeshjes, ai mbrojti qasjen taktike, por kritikoi mungesën e efikasitetit në të dy zonat.
“Më pëlqeu shumë ajo që pamë në 35 minutat e para. Bëmë shumë gjëra mirë me dhe pa top, krijuam raste të mira dhe i mbajtëm larg rrezikut. Por 20 minutat pas penalltisë nuk ishin aspak në nivelin e një skuadre si Liverpool në aspektin defensiv,” tha ai.
Ai shtoi se problemet janë të përsëritura: “Humbasim rastet tona, ndërsa rastet e pakta që pësojmë zakonisht përfundojnë në gol. Duhet të përmirësojmë mbrojtjen në zonë dhe kjo u pa edhe sot.”
Edhe mesfushori Dominik Szoboszlai ishte i drejtpërdrejtë në analizën e tij, duke vënë në dyshim mentalitetin e skuadrës:
“Shpirti luftarak nuk ishte aty sa duhet, mentaliteti nuk ishte në nivelin e duhur. Asnjëri prej nesh nuk ishte aty sa duhet, për të qenë i sinqertë.”./GazetaExpress/
