Aro Muriç do ta provojë një eksperiencë të re larg Anglisë.

Portieri i Kombëtares së Kosovës është transferuar sot në Serie A.

Sassuolo do të jetë së paku për një vit ekipi i ri i portierit shqiptar nga Mali i Zi, shkruan “Gazeta Express”.

Klubi italian ka njoftuar sot se i ka siguruar shërbimet e portierit shtatlartë për sezonin 2025/26.

Në fakt, portieri i lindur në vitin 1998 ka përfunduar tek klubi Gjelbër e Zi në formë huazimi për një vit.

Ndërkohë, Sassuolo e ka mundësinë e blerjes përfundimtare të kartonit të tij nga Ipswich Town në verën e vitit 2026.

“Arijanet Muriç, nga krejt familja Gjelbër e Zi, mirë se erdhe”, shkroi klubi italian pasi e zyrtarizoi transferimin e portierit të Kosovës.

I lindur në Schlieren të Zvicrës, Muriç ishte rritur futbollistikisht tek sektori i të rinjve të Zurichut dhe Grasshoppersit para se të transferohej në Manchester City në vitin 2015.

Tek “Citizens” qëndroi deri në vitin 2018 duke e nënshkruar kontratën e tij të parë profesioniste para se të përfundonte në formë huazimi në NAC Breda në Holandë ku e bëri edhe debutimin në futbollin e të mëdhenjve më 18 gusht 2018 në Eredivise.

Në Holandë qëndroi pak pasi u thirr për t’u rikthyer në Manchester vetëm një muaj më pas dhe debutoi në Kupën e Ligës me anglezët duke qëndruar më pas gjatë krejt sezonit në Angli.

Në korrik të vitit 2022 kishte kaluar në Nottingham Forest para se t’i kalonte disa huazime në Girona, Willem II e Adama Demirspor.

Më pas u ble nga Burnley, me të cilin e fitoi Championshipin në vitin e parë dhe për dy vjet me këtë ekip, mes Championshipit, Premierligës dhe Kupave Nacionale, i zhvilloi 51 ndeshje. /Gazeta Express