Mohamed Salahu do të rikthehet në skuadrën e Liverpoolit për ndeshjen e së shtunës në Premierligë kundër Brighton & Hove Albion, pasi zhvilloi bisedime vendimtare me trajnerin Arne Slot të premten.

Sulmuesi egjiptian javën e kaluar deklaroi se “nuk kishte asnjë marrëdhënie” me trajnerin holandez – një nga disa komentet shpërthyese në një intervistë pas barazimit 3-3 ndaj Leeds United.

Si pasojë, ai u la jashtë skuadrës për ndeshjen e mesjavës kundër Interit.

Tani kuptohet se Salahu do të rikthehet në ekip për ndeshjen ndaj Brightonit, megjithëse detajet e bisedës mes tij dhe Slot mbeten të paqarta.

Gjatë konferencës së së premtes, Slot përsëriti se çdo vendim për pjesëmarrjen e Salahut do të varej nga takimi i tyre.

“Do të kem një bisedë me Mo këtë mëngjes dhe rezultati i asaj bisede do të përcaktojë se si do të duket situata nesër,” tha trajneri holandez.

“Ajo që më duhet është një bisedë me të. Mendoj se herën tjetër që duhet të flas për Mo, duhet ta bëj këtë me të dhe jo këtu. Ju mund të vazhdoni të pyesni, por s’kam shumë për të shtuar përveç se flas me të sot. Siç e thashë, rezultati i asaj bisede do të përcaktojë si do të jetë situata nesër”, përfundoi ai./GazetaExpress/