Southampton rikujtoi frymën e skuadrës që fitoi FA Cup në vitin 1976, duke eliminuar në mënyrë sensacionale Arsenalin në çerekfinale në “St Mary’s”, duke i dhënë fund serisë prej 14 ndeshjesh pa humbje në transfertë të “Topçinjve”.
Skuadra e drejtuar nga Mikel Arteta kishte dy raste të hershme me Gabriel Martinelli dhe Max Dowman, por tentativa e brazilianit u bllokua në mënyrë fantastike nga Taylor Harwood-Bellis.
Nga ana tjetër, vendasit treguan se nuk ishin thjesht “viktimë”, me Léo Scienza që rrezikoi portën e Kepa Arrizabalaga.
Arsenali vazhdoi të sulmonte, me Martin Ødegaard që u ndal nga Daniel Peretz, ndërsa një tjetër rast i humbur rriti frustrimin e Artetës.
Ndëshkimi erdhi kur Ross Stewart kaloi Southampton në avantazh pas një kundërsulmi të shpejtë.
Arsenali pati mundësi për barazim, por gabimet në mbrojtje pothuajse i kushtuan shtrenjtë, ndërsa Scienza goditi edhe traversën.
Megjithatë, zëvendësuesi Viktor Gyökeres barazoi rezultatin pas asistimit të Kai Havertz.
Kur pritej përmbysja e Arsenalit, ishte sërish Southampton që goditi.
Tom Fellows asistoi për Shea Charles, i cili shënoi golin e fitores për 2-1.
Pas minutave dramatike shtesë, skuadra e drejtuar nga Tonda Eckert siguroi një fitore historike dhe kualifikimin në gjysmëfinale.
Southampton tani pret një udhëtim në “Wembley”, ndërsa Arsenali humbet një tjetër mundësi për trofe në një periudhë zhgënjyese për ekipin e Artetës./GazetaExpress/
